Parlamentario Alan Howell durante prome ronda di tratamento di presupuesto 2018 diahuebs mainta a duna hopi importancia na e aspecto di Husticia.
El a enfoca hopi riba e parti di combatimento di criminalidad, mientras cu a presenta mocionnan pa mehora y agilisa algun proceso manera ta otorgamento di rijbewijs. Tambe el a bisa cu e iniciativa di ley pa bin cu castigonan minimo pa esnan cu ta comete atraco, abuso di mucha y abuso sexual ta practicamente cla. “Asina aki nos ta bay combati criminalidad na Aruba, asina aki nos ta bay planta respet na Aruba”, Parlamentario di POR a duna di conoce.
Tambe Alan Howell a bisa cla y raspa cu tin un Minister di Husticia cu ta cla pa yuda, pero cu e so no por hacie y pesey Parlamento tey pa sostene den su esfuerso pa combati criminalidad y trece trankilidad bek den nos comunidad.
Atendiendo e parti di deporte el a bisa cu “deporte a sangra te muri aki na Aruba” y esey no ta solamente e sentimento di Alan Howell, pero di hopi den nos comunidad. Awo cu a bin cambio di Minister y Aruba a haya un persona cu si tin curason pa Deporte, ya caba por sinti e cambio. POR ta content cu esaki, pero kier mas cambio positivo ainda. Parlamentario di POR a bisa cu Minister por conta 100% cu Fraccion di POR pa cualkier decision cu e tuma na bienstar di deporte pasobra manera e dicho ta bisa, ‘un deportista mas ta un criminal menos’.
Otro mocion cu Parlamentario Alan Howell a entrega durante tratamento di presupuesto ta uno cu a haya e nomber di ‘Gevarenpremie’. E ta un muestra di sosten y gratitud pa tur esnan cu ta pone nan bida na peliger realisando nan trabou, manera ta polis, brandweer, douane recherche, personal di KIA y personal di CEA cu ta traha na KIA. El a pidi gobierno pa sondea e posiblidad pa dunanan un premie riba nan salario pa luna.
Igualmente a entrega otro mocionnan cu a conta cu sosten di coalicion, mescos cu esunnan ya caba menciona. Uno ta trata riba e posibilidad pa esnan cu a sinta un castigo di por lo menos dos aña y cu a demostra un bon conducta durante nan castigo por haya un documento cu ta demostra nan bon conducta, pa por solicita y bin na remarke pa haya trabou den areanan predetermina.
E otro mocion ta urgi gobierno pa mira e posibilidadnan pa recluta mas polis y promove entre nos hobennan e estudio pa bira polis y asina amplia nos Cuerpo Policial logrando e meta di tin mas polis riba caya, esaki a pesar di e situacion precario di noso finansas publico laga atras pa gobierno anterior.
Parlamentario Alan Howell ta spera cu e mocionnan aki por conta cu e sosten tambe di oposicion pasobra ta trata di aspectonan positivo pa nos pais. E ta considera cu a yega ora pa pone un fin na e politica partidista den Parlamento y tur 21 miembro mira den un solo direccion: Bienestar di Aruba y nos hendenan.
