Parlamentario Alan Howell durante conferencia di prensa a bisa claramente cu el lo para pa San Nicolas na tur momento y na momento cu e wak cosnan robes tumando lugar, el lo sa di bin dilanti y boga y lucha pa su pueblo, en especial pa esnan di pariba di brug.
El a indica cu e ta un representante di henter pueblo, pero ora ta trata di San Nicolas e ta bira un poco mas fastioso. Esaki ta loke ta sosodiendo na e momentonan aki tambe. Diferente servicio di Departamento di Asuntonan Social a wordo saca for di San Nicolas y manda Playa. Hopi hende di pariba di brug a bisa e parlamentario di POR cu nan ta hopi desapunta cu e situacion aki.
Howell no ta di acuerdo cu e cambio aki y a atende cu e situacion rapidamente cu minister di Asuntonan Social, kende tambe a desaproba e movecion aki di Departamento di Asuntonan Social.
E mandatario a keda di bay wak kico ta e motibo specifico cu a manda algun servicio pa Playa y cu ta pone cu e hendenan di San Nicolas, esnan cu no tin auto, mester subi bus pa haci nan diligencianan dificultando nan bida mas ainda, sin conta e placa extra cu nan mester saca pa por yega Playa y regresa.
“Nos ta den aña 2018, ta dilanti nos tin cu bay, nos no tin espacio pa bay atras, nos no tin espacio pa San Nicolas sigui bay atras y cu Alan Howell den Parlamento esey sigur sigur no lo bay facil tampoco. Den fin di siman mi a tuma contacto cu e minister kende a sigurami cu el lo bay tira un bista riba loke ta pasando”, Alan Howell a duna di conoce.
Banda di esaki e por a compronde tambe cu onderstand di un cantidad di persona a wordo blokea sin cu nan a wordo adverti riba esaki di antemano. Tur hende sa cu e situacion di bida di esnan cu ta cobra onderstand den mayoria di caso no ta facil y awo nan mester confronta cu sea nan a haya menos placa of e placa a wordo blokea.
Howell ta expresa cu ya caba tin suficiente problema social na Aruba y cu mester por tin un miho manera di proceder den e situacionnan aki evitando asina e sorpresa desagradabel cu e personanan aki a haya.
Hopi di e personanan di San Nicolas cu nan placa a wordo blokea mester a bay te Playa pa busca un apoderacion (machtiging) y “esaki ta cosnan inaceptabel. Servicionan cu nos tabatin na San Nicolas gewoon di un dia pa otro ta desaparece y ta bay Playa hibando asina e calidad di bida di hendenan di pariba mas atras cu e ta caba.
“Nos no a drenta den e gobernacion aki pa hiba ningun hende atras, al contrario, nos kier wak hende bay dilanti y mi ta contento cu minister Glenbert Croes a dunami rason den esaki ademas cu e tambe ta di opinion cu nos hendenan di San Nicolas hamas mester wordo perhudica y lo zorg pa e hendenan aki haya nan servicionan bek na San Nicolas”, Alan Howell a duna di conoce.
Finalisando e parlamentario di POR a haci un extra yamada na minister Glenbert Croes pa zorg cu tur servicio regresa San Nicolas mas lihe cu ta posibel pasobra ta inaceptabel cu den 2018 nos hendenan di Pariba di Brug mester bay pabou pa servicionan cu tin di haber cu Departamento di Asuntonan Social. “San Nicolas no por bay mas atras, ta dilanti so e por bay, na momento cu e bay atras, nan ta bay scucha mi bos”.
