Alan Howell (POR) ta sostene posicion pa mantene frontera cu Venezuela cera

Parlamentario di POR, Alan Howell ta satisfecho cu e contestanan ricibi for di Minister di Husticia relaciona cu e situacion di asilo. Siman pasa e fraccion blauw den Parlamento a pidi pa un encuentro cu e mandatario, cu a trece claridad riba varios punto di preocupacion. Un di e puntonan cu Howell a keda satifecho cune ta cu Minister di Husticia a sigura cu lo sigui cera nos frontera mas cu ta posibel.

Loke mas el a gusta ta cu despues cu Fraccion di POR a manda e señal cla y raspa pa Gobierno, cu nos pueblo ta hopi preocupa, por a mira cu siguiente dia Gobierno a tene un reunion cu tur e stakeholdernan cu ta atende cu e tema di husticia, esaki ta demostra cu Gobierno ta actua y traha cu tur seriedad.

 

Alan Howell POR cu conferencia di prensa. Click link pa mas https://24ora.tv/2LMxdQF

Posted by 24ora on Tuesday, May 14, 2019

Riba e pregunta haci na Minister di Husticia riba maneho di loke ta e Schiphol Model (ora un persona pidi asilo, ta mira si e ta bin na remarca y durante e proceso di por lo menos 28 dia, e persona aki lo permanece na un lugar defini, den e caso aki Warda Nos Costa), el a bisa cu ta screen e personanan aki, mira si nan ta bin na remarca pa asilo, cual ta dificil mirando cu gran parti di esnan cu ta pidi asilo no ta cay den e categoria di asilo politico, sino economico y nos no tin un acuerdo pa cu esaki. Howell ta indica cu e proceso aki ta manda un señal bon cla pa nos pais bisiña cu Aruba no ta un ‘free for all’.

Tambe Fraccion di POR ta contento cu por a mira e posicion fuerte cu Gobierno a tuma pa loke ta apertura di frontera di parti di Venezuela, mientras tanto nos Ministro Presidente a dicidi cu e frontera no lo habri. Esaki ta un posicion cu ta demostra cu a pesar cu nos ta un isla chikito, no ta permiti otro pa bin tuma nos haci chambon, Alan Howell a declara.

El a agrega cu Fraccion di POR ta para tras di e posicion tuma door di e prome mandatario di mantene e frontera cera por lo pronto, esaki teniendo na cuenta e situacion actual na Venezuela.

“Posiblemente mantene e frontera cera lo por tin efecto riba otro companianan, pero hopi biaha bo mester wak bienestar general y mi ta kere cu na e momentonan aki ta importante pa mantene e frontera cera pa por tin un miho control riba nos fronteranan”, Alan Howell a conclui.