Parlamentario di fraccion di POR, Alan Howell ta contento cu e desaroyo tumando luga cu e repatriacion di ciudadanonan Venezolano cu ta(bata) pega na Aruba pa hopi tempo.
Por a mira cu diaranson un di dos vuelo humanitario a sali rumbo pa Venezuela cu un total di 134 pasahero, cual un parti di nan tabata na Guarda Nos Costa. Den Parlamento, Howell a haci hopi pregunta na Minister di Husticia riba con e ta bay soluciona e situacion na Guarda Nos Costa mirando cu hopi biaha e presion cu tin eynan ta trece inseguridad pa e trahadonan.
Naturalmente e aspecto humanitario tambe ta hopi importante pa tene na cuenta mirando cu varios di esnan cu ta eyden lo desea di regresa nan pais. Ta pa hopi lunanan a traha duro pa logra realisa e dos vuelonan humanitario aki y por a compronde cu ta trahando pa un di tres vuelo tuma luga.
Minister di Husticia a priminti cu el lo haci su maximo esfuerso pa busca un forma pa toch logra pa e hendenan aki por bay nan pais bek y asina trece e trankilidad bek na Guarda Nos Costa y esaki el a logra cu bon cooperacion di diferente instancia. Parlamentario Howell a gradici e director Richard Kramers pa tur esfuerso brinda den esaki.
Alan Howell tin confiansa cu un di tres vuelo humanitario lo tuma luga pronto y di e forma aki lo mehora mas ainda e presion cu e departamento importante aki tin.
