Alan Howell (POR): Gobierno tin un siman pa soluciona asunto di Spearfishing

Durante un bijeenkomst diabierna atardi na Parlamento pa atende cu e tema di pesca na Aruba, parlamentario Alan Howell di Fraccion di POR a indica cu e ta spera cu e ministernan concerni por yega na un acuerdo pa e piscadonan por sali beneficia. E lo a desea cu e reunion lo por tabata un reunion publico pa por a presenta y aproba mocionnan na fabor di esunnan cu a pidi e reunion aki, specialmente esunnan cu menos tin pa come na cas y cu ta purba sobrevivi. Nan no kier tende storianan largo. 

Howell a indica cu menos mal nos ta biba na Aruba y no na un pais menos civilisa, pasobra e rumbo den cual e reunion aki tabata bayendo, e polisnan cu tabata den tribune lo a bira tiki y dificilmente lo por a sali for di edificio di Parlamento. “Loke ta pasando aki den awe no ta loke pueblo kier scucha y probablemente lo caba tambe cu loke pueblo no kier scucha. Awe ta dia pa nos para mas banda di pueblo cu ta posibel. Mi no kier bay den e discusion di e parti tecnico, riba e parti di proteha esaki of proteha esey; ken tin rason y ken no. Esaki pasobra nos ta mira claramente cu tin otro problema: tin un minister cu tin su maneho y ta sigui riba su maneho como debe ser, pero tin otro ministernan cu tin otro pensamento…nice. Pero e pregunta pa e ministernan ta si e comportacion aki a yuda e homber chikito cu mester tira su pisca pa trece cuminda na mesa?”, Alan Howell a duna di conoce.

El a continua bisando cu e rumbo di e reunion ta indica cu e famia, e muchanan cu ta warda riba su mayor yega cas despues di pisca pa por come algo lo keda defrauda y ta spera cu toch esaki cambia prome cu yega na final. Den mesun rosea e ta bisa cu e ta respeta tur e leynan di naturalesa, e ta bin di Cuerpo Policial y e ta respeta ley, pero tambe tin spirito di ley y e momento aki no tin otro opcion pa e parlamentario di POR cu para banda di esnan cu mester di e pisca ey pa sobrevivi.

“Mi kier pa nos tur pone man na nos curason, segun mi nos tur a cobra dia 24, pero tin hende cu no a cobra ainda y no sa tampoco kico nan ta bay come. E ora con por ta posibel cu nos cu si a cobra dia 24 ta bay sali for di e reunion aki sin por para nada banda di esun cu no a cobra y cu ni sikiera pisca e por a haya pa sobrevivi. Mi ta spera cu ainda gobierno por yega riba un liña pa por haya un bon noticia pa esnan cu ta dependiendo riba nos na e momentonan aki’, Howell a bisa den sala di Parlamento.

El a sigui bisa cu si acaso e tres ministernan den sala no por yega na otro, mester tin un solucion pa nan y lihe tambe y cu el lo dunanan maximo 1 siman. A pone enfasis riba e parti cu esaki no ta un menasa, cu e ta hefe di gobierno y tin derecho di bisa gobierno na bienestar di pueblo kico e ta desea pa pasa. “Mi no kier pa ministernan tum’e como menasa, pero pa nan scuch’e bon y yega na otro di con lo bay logra yuda nos hendenan aki cu tin mester di nos, cu tin mester di pone pisca riba mesa y tin mester di come”.

Terminando, Alan Howell a bisa cu el a lanta den un bario unda e hendenan ta pisca, e sa kico ta bay lama, e sa con e dolor ta y con duro e ta ora mester lanta marduga pa bay pisca y core e riesgo di no bolbe cas. E conoce hende cu a bay pisca y no a bolbe mas y tin hopi hende cu ta haciendo un yamada na nan pa por fabor convence gobierno pa yega na un solucion. Na final di e reunion Minister Andin Bikker a presenta un solucion cu a cay den bon tera cerca tur esunnan den sala di Parlamento.