Alan Howell (POR): A ricibi datonan specifico riba progreso di retonan social  

Minister di Asuntonan Social y Labor, Glenbert Croes, a presenta na Parlamento pa duna cuenta con e Crisis Sociaal Plan ta progresando. Como deber di Gobierno, segun Alan Howell, Parlamentario di Fraccion POR, mester informa Parlamento di con ta alocando fondonan pa por sigui controla. Loke a presenta, Parlamentario Howell ta hopi satisfecho, pasobra por a mira no solamente un plan, sino tambe cifranan, datonan unda a cuminsa, unda nan ta awe y unda mester bay.

Na Aruba tin problema cu datonan y historia a mustra cu un pais cu no tin dato, no por midi. Pa e Parlamentario ta importante cu awe a presenta tur dato specifico riba grafico cu ta mustra con ta progresando, pa por enfrenta y remedia e problemanan social cu tin na Aruba. “Nos tin un problema social grandi. Mi ta kere cu niun hende no por nenga esaki,” el a expresa. No ta pornada a aproba e Crisis Plan Sociaal unanimamente.

Alan Howell a participa den eleccion na aña 2013 riba number 27 di Partido AVP y a haya 422 voto riba su nomber. Na aña 2017 el a join partido POR y a haya number 5 pero a bay dilanti te na 461 voto. E ta e unico candidato riba lista di POR cu a bay dilanti den voto den e ultimo eleccion.

Asina mira cu un ley a pasa unanimamente, esey kiermen cu Parlamento completo ta reconoce cu sea tin un problema of mester un mehoracion of ta necesario p’e ley pasa.

E Parlamentario di Fraccion di POR ta lamenta cu awor ta organisa manifestacion pa lanta pueblo na luga cu tur sinta cabes hunto, cabes rustig, frieu y mira den mesun direccion pa resolve e problemanan serio cu tin den nos pais.

Tambe por a mira riba e graficonan cu e departamentonan a mehora. Hopi biaha kier profesionalnan ta traha den e puestonan y haci milager. Pero hopi biaha nan no tin e hermentnan. Esey ta un di e motibonan cardinal pakico el a sali di Cuerpo Policial y ta gradici Dios di por a drenta Parlamento pa haci un diferencia den Parlamento.

Asina aki lo ataca y drecha e problemanan social. E no ta spera cu lo caba cu tur problema social, pero si cu por ataca y baha e cantidad di problemanan social cu tin na Aruba. No mester lubida y mester corda semper, si bo bisiña tin un problema social abo tambe tin un problema social, el a bisa. “Hopi biaha nos ta bisa cu ami ta biba bon. Mi a bisa nan cu no pasobra nos ta bisti bachi aki den, nos tin cu kere cu nos no tin problema social”.

Segun Parlamentario Alan Howell, asina cu tin crisis den problema social na nos pais, nos tur tin problema social. Esey ta e mensahe cu e kier laga pa tur hende corda cu ora mira hende sufri di tal cos of tin problema social, abo no hari y kere cos ta bon cu bo. For di e momento cos ta malo pa bisiña, na modo di bisa cos ta malo pa bo tambe. E ta spera cu tur por sali y cana den mesun direccion pa traha hunto pa un miho Aruba, pa un Aruba cu menos problema social.

Alan Howell (POR): A ricibi datonan specifico riba progreso di retonan social #crisisplansocial

Posted by 24ora on Friday, April 5, 2019

Comments

comments