Alan Howell: Kier sa e banda di medaya di FCCA

Durante conferencia di prensa di Fraccion di POR, Alan Howell a comenta riba preocupacionnan cu ta reina cerca algun ciudadano den comunidad pa loke ta trata maneho di FCCA.

El a comenta cu el a wordo acerca pa varios persona cu e preocupacion cu ta reina pa loke ta FCCA. Mencionando un ehempel, Howell a expresa cu tin ciudadanonan bibando den casnan di pueblo, nan a lanta for di baby eyden y ta registra na dicho cas y despues cu nan mayor a fayece, nan ta haya nan mes cu e mal noticia di FCCA cu ta dunanan un tempo cortico pa bandona e cas.

Alan Howell ta bisa cu e no tin gana di kere cu esaki ta algo di berdad pasobra e no por imagina su mes cu tin un famia cu despues di ta biba 20-30 aña den e cas, despues di haya e sla duro cu p.e. nan mama a fayece, ta haya otro golpi di FCCA cu ta dunanan un aviso cu den un tempo cortico nan tin cu bandona e cas den cual nan a lanta for di baby den dje. “Scuchando esaki ta haci un dolor grandi na mi curason, e ta un dolor grandi pa e famia, bo ta mira e preocupacion cu e famianan aki tin na momento cu nan ta acercami. Cu lagrimanan den nan wowo bo ta scucha nan storia, con preocupa nan ta, den e situacion fastioso den cual e peticion di FCCA ta hincanan, mirando cu nan tin un dolor caba cu perdida di nan ser keri y awo aki nan ta bay ta tambe riba caya”.

E parlamentario ta sigui bisa cu mirando cu e vision di gobierno ta en principio pa nos ciudadanonan haya dak riba nan cabes, e no por compronde e maneho aki cu ta kita dak di nos ciudadanonan. “E ta inaceptabel”.

Na mes momento Howell ta bisa cu tur medaya tin dos banda y pa tal motibo el a haci un peticion oficial a traves di Parlamento pa den un reunion di comision fiho invita FCCA pa duna un splicacion riba e tema aki, wak si esaki ta berdad of no.

“Di akinan caba mi ta spera di scucha di FCCA cu loke e ciudadano aki ta splica no ta cuadra cu berdad, cual ta sona un tiki straño y fastioso, pasobra no ta un ni dos ni tres famia a acercami, masha hopi famia ta acercandomi ultimo dianan aki y mi por a compronde cu e famianan aki ta acerca Minister Glenbert Croes tambe. Loke mi kier splica cu esaki ta cu e ta algo cu probablemente ta pasando berdad y ta yega ora pa nos scucha di FCCA con e maneho ta, si esaki ta berdad of no. Mi ta bisa di aworaki cu si esaki ta berdad, nos lo mester busca un forma pa nos stop esaki mesora, pasobra ta imposibel cu un persona por lanta den cas di pueblo for di baby, 20, 21, 22 aña bibando aden y pa su mala suerte su mama ta fayece y net su tras ta haya carta cu e tin cu bandona e cas cu e ta considera su cas”. Alan Howell ta puntra si mester saca e persona ey for di e cas ta pa hinca ken eyden anto?

E ta continua bisando cu ta tristo pa scucha cu e personanan aki ta perde nan dak, ta riba caya, no tin caminda pa bay biba. Ya caba e situacion ta basta fastioso pa nos ciudadanonan por haya un cas y aworaki tin e fenomeno cu nos ciudadanonan ta perde cas na momento cu nan mayor fayece. “Esaki ta algo cu nos mester ‘touch base’ cune mesora, tin cu scucha e banda di medaya di FCCA y si ta berdad, nos di Parlamento y Gobierno en general mester busca un manera pa nos para e forma di maneha aki, para e forma di pone nos hendenan riba caya, pasobra den gobernacion aki nos ta propaganda cu e ser humano ta central y aki nos tin cu keda demostra tambe cu nos tin e ser humano central. Ami sigur como parlamentario representante di pueblo lo para 100% tras di e famianan aki pasobra ta imposibel y inaceptabel pa nos mira nos ciudadanonan ta pasando den pena familiar y extra pena pasobra nan ta bay ta riba caya y sin ningun luga pa bay biba”, Alan Howell a duna di conoce.