Aksel Cijntje ta risibí rekonosementu di Minister Marilyn Alcalá-Wallé

Aksel Cijntje (35), kampion di “handbike” a risibí rekonosementu di Minister di Enseñansa, Siensia, Kultura i Deporte, sra. Marilyn Alcalá-Wallé, pa su determinashon i perseveransia den bida i deporte. Aksel ta un “handbiker” ku talento Deportivo Úniko i un Bon Yu di Kòrsou bibá na Hulanda.

E rekonosemetu aki ta muestra di esfuersonan grandi di un Yu di Kòrsou ehemplar” segun Minister M. Alcalá-Wallé. Den kuadro di esaki, Aksel a risibí un plaka di merito i un pen di nos bandera nashonal. E bandera aki ta fungi komo rekonosementu ku Aksel ta keda un Bon Yu di Kòrsou maske e ta biba na Hulanda. Komo e Bon yu di Kòrsou e ta eksponé su mes en grande den eksterior i di e forma aki e ta eksponé nos pais Kòrsou. Na Hulanda Aksel a risibí e premio di “Unique Sporttalent 2017”, komo ganadó di e sekshon di deportistanan ku un limitashon físiko. Apesar di su limitashon ku a wòrdu okashoná dor di un insidente na 2011 ku a kousa “dwarsleasie’, nunka Aksel no a entregá, sino perseverá i yega “on top”. Aksel su motivashon pa lanta determiná pa perserverá tur mainta ta su fe den Dios. Tambe Aksel ke ta un ehèmpel pa otronan i yuda esnan ku limitashonnan físiko. Aksel su vishon ta pa kibra ku tabú, pa motivá i yuda krea un infrastuktura na Kòrsou pa hendenan ku limitashon por tin e posibilidat pa hasi deporte. Den kuadro di esaki Aksel a lanta su mes fundashon ku ta yama “You are a Hero”. Un di e métanan prinsipal ta pa kuminsá un fundashon di handbike i un tim di handbikers na Kòrsou i Hulanda pa asina por bai kompetí riba nivel internashonal.

Na banda di esaki “You are a Hero” ta organisá evenementonan di deporte, klinika di handbike charla i hopi mas. Den 2016 “You are a Hero’ a organisá e promé kompetensia di handbike i diferente klínika na Kòrsou pa asina krea konsientisashon di e importansha pa hasi Kòrsou aksesibel pa hendenan ku un limitashon. Awor na 2018, durante luna di òktober fundashon “You are a Hero” ke lansa e di dos edishon di kompetensia di handbike na Kòrsou.Den kuadro di esaki Aksel ta buska spònsor, donashon i tur hende ku di un òf otro manera ke duna un aporte pa hasi e kompentensia di handbikers den òktober di 2018 un realidat. Donashonnan (kèsh of chèk) por wòrdu hasí entre 7.00-20.00 den e box di donashon na: Dolphin Suites Hotel (e lugá blou banda di e parkeo di Sea Aquarium) Bapor Kibra z/n Tambe por hasi donashon via banko, riba number di kuenta di ING Bank NL89INGB0007036932 riba nòmber di Stichting You are a Hero. Denter di poko tambe esaki lo ta posibel riba un kuenta lokal. Pa mas informashon por tuma kontakto ku Aksel Cijntje na: info@you-are- a-hero.org òf via di tel: 5246256 Gobièrnu di Kòrsou ta felisitá Aksel Cijntje ku su gran logronan i ta deseyé hopi éksito den su futuro karera. Danki pa ta e Bon Yu di Kòrsou!