Aki dos siman sentencia den caso di atraco fatal na Wayaca

Diabierna mainta Corte a sigui cu e caso di Wayaca unda e comerciante Chines Sasha a wordo herida mortalmente durante un atraco. E dos acusadonan den e caso aki ta su sobrino Po Sing Fan y e empleado di e sobrino Jefferson Echobardo.

A presenta resumen di cuenta bancario y testamento di e victima. Loke a resalta ta loke tabata s acaba di e comunidad Chines, ta cu nan tin cuenta bancario solamente pa atende cu clientenan cu ta exigi esey. A constata cu e cuenta di e acusado Fan no ta mustra cu e negoshi tabata uno lucrativo, cu poco transferencia mensual. Tambe a constata un deposito cash inusual di 70 mil florin, cu aparentemente el a hay afor di su tata pa paga un mashin cu mester a wordo cumpra pa e negoshi.

Pa fiscal e datonan nobo no ta bisa nada den defensa di e acusado. Un cuenta di banco positivo no ta bisa nada den motibo pa un asesinato. E ora lo por pensa cu solamente e pobernan tin motibo pa comete delito, cual no ta e caso. Hendenan cu placa tambe por comete delito, manera den e caso aki cu OM ta kere cu e acusado tabatin mester di placa pa cuminsa un bida nobo cu su pareha nobo. Mas ainda si mira cu esun cu ta maneha negoshi y famia ta e tata. Nan niun ta haya salario, pero e tata ta dicidi, aunke den Corte el a bisa lo contrario. Loke e tata a bisa den Corte, cu e no tin nada di bisa den e negoshi, ta un “leugen” Fiscal a bisa, basando su mes riba declaracion di diferente testigo.

Un di e yiunan a declara cu e mester traha di dia y anochi sin haya salario. Si e mester placa pa cumpra paña e mester pidi e tata. Y ora cu e kier a bay independisa su mes, ora cu el a bira tata, su mesun tata a rabia cun’e y nunca mas a papia cun’e. Esey ta e motibo tambe cu famia Fan no ta mucho na bon cu Sasha, pasobra el a yuda e yiu aki pa cuminsa cu su mesun negoshi. “Ora cu mi tata no ta di acuerdo cu un hende, e kier sa cu tur su famia mester rabia cu e hende aki y keda sin papia cun’e tambe,” e yiu mayor y e “black sheep” di famia a declara.

Fiscal a bisa cu e no tin motibo pa desvia di e demanda y mas bien a keda convenci cu e acusado Jefferson a papia berdad den tur loke el a bisa di su ex hefe.

Dia 9 di mei Hues lo dicta sentencia den e caso aki.