E problematica di turistanan cu ta purba bandona Aruba cu cocolishi, coral of santa blanco ta sigui. Conforme e tratado internacional di CITES, e landsbesluit local Natuurbescherming Inheemse Flora & Fauna y e Zandverordening, ta prohibi pa saca y exporta cocolishi, coral y/of santo blanco for di Aruba. Diferente departamento di gobierno ta hunga un rol pa evita esaki manera Duana, Veterinaire Dienst y Directie Natuur en Milieu.
Ta resalta cu tur dia duana ta intercepta turistanan cu ta bayendo bek nan pais cu cocolishi, santo blanco y coral cu ta saca for di nos naturalesa. Esaki ta tumando luga pa lunanan largo caba.
E cantidad abnormal di cocolishi, coral y santo blanco confisca ta mustrando den direccion cu ta hende local mes ta ofrece y bendenan cu turistanan. Esaki ta contra ley y tin un multa halto como consecuencia.
E mesun accion aki ta duna un mal ehempel na turistanan cu ta pensa cu si un hende local mes por piki y bende, nan tambe por bay piki nan mes, provocando un acto contra ley sin sa. Na aeropuerto ta confisca e material y e turistanan ta haya nan mes confronta cu un multa pisa.
E sorpresa no agradabel aki ta duna Aruba un mal nomber den exterior. Specialmente awo den un temporada dificil unda cu ta net ora mas nos mester tuma responsabilidad pa mustra nos miho banda na e turistanan. Esey ta inclui nos responsabildad pa respeta nos leynan y nos responsabilidad pa preserva y conserva nos recursonan natural.
Nos naturalesa NO ta pa haci negoshi cu ne. E ta pa ofrece nos turistanan, nos mes y nos futuro generacion e placer di su beyesa unico. Algo pa ta orguyoso di dje. Su conservacion ta cuminsa na nos!
