Djabièrnè último Refineria Isla a ekperensiá un ‘total black-out’ na momentu ku suministro di tur utilidat a kai afó na un manera inesperá.
E unidatnan ku tabata den produkshon a para, ya ku nan no tabata risibí suministro di koriente, stom i airu komprimí. E kaida di utilidat tabata di tal índole ku asta e ofisina prinsipal di refineria a keda sin koriente i mester a manda empleadonan kas.
Durante fin di siman profeshonalnan di Refineria Isla a traha pa manehá e plantanan mas mihó posibel, pendiente e momento ku suministro di utilidat pa refineria keda restablesé.
Koriente
Finalmente djadumingu atardi a logra restablesé un nivel hopi límita di utilidat. A restablesé suministro di sufisiente megawatt di koriente ku kual por a pone edifisionan bèk den operashon. Konkretamente a logra pone lus, èrko i sistemanan di kòmpiuter bèk den operashon. Na mes momento tambe a reanudá entrega di gas pa distribushon i konsumo lokal.
Stom
Suministro di stom sinembargo ta sigui ta bou di nivel. Promé ku e ‘black-out’, Refineria Isla tabata usa alrededor di 145 tòn di stom pa ora. Despues di e ‘black-out’, a restablesé suministro di stom, pero esaki no tin sufisiente preshon pa por start e plantanan bèk. E ‘black-out’ a pone ku diferente unidat i liñanan a pèrdè temperatura kual a pone ku produktonan a keda pegá den e sistema i blokiá sirkulashon. Spesialmente e sistema di asfalt a keda bastante blokiá. Awor mester tuma paso pa limpia e liñanan p’asina por rekobrá sirkulashon di produkto. E falta di stom aki sinembargo ta difikultando e proseso di hasi liñanan limpi na algun planta.
Krudo
Na momento ku e ‘black-out’ a tuma lugá, refineria tabata prosesando alrededor di 50 mil bari di krudo pa dia i tabata trahando pa oumentá e produkshon. Manera kosnan ta awor aki, refineria ya ta konfrontando kuater dia di pèrdida di produkshon i ainda no tin bista ki dia suministro di utilidat lo normalisá. Mientras tantu tin hopi pèrdida di tempu i tin hopi gastu pa remediá e opstrukshon den e liñanan di asfalt. Suministro di krudo ta bai man-den-man ku suministro di utilidat konfiabel. E ‘black-out’ di djabièrnè ta representá un retraso den e proseso pa oumentá produkshon ya ku prosesamentu di krudo mester por konta ku suministro kontinuo i adekuá di koriente, stom, airu komprimí i awa.
Konklushon
E situashon ku a surgi siman pasá djabièrnè ainda no a keda solushoná. Na promé lugá falta stom pa por kaba di habri e liñanan ku a keda blokiá pa falta di temperatura. Tampoko no tin sufisiente preshon di stom pa por pone plantanan bèk den produkshon. E insidente di djabièrnè ta parti di un kadena di diferente insidente kaminda produkshon di Refineria Isla repetidamente ta keda interumpí pa falta di utilidat.
Refineria Isla ta keda optimista ku pronto esnan konserní lo bini ku un solushon pa garantisá suministro na nivel i kontinuo di utilidat. Entrega konfiabel di koriente, stom, airu komprimí i awa ta sumamente importante pa hasi futuro prosesamentu di krudo den e refineria konfiabel i ekonomikamente viabel.
