Tin e pensamento pa hala Carnaval 2021 di luna januari pa juli. Haci e cambio aki por tin diferente factor y por ta esaki lo ta bon pa carnaval. Mirando e situacion economico mundialmente, ta pone cu hopi grupo y organisacion di carnaval mes no lo por haya placa cu nan ta haya for di sponsor.
Manuel Da Silva, organisado di Hebbe Hebbe, ta kere lo ta un bon movecion pa hal e. Lo ta un tiki dificil, pasobra mester tene cuenta cu e parti religioso. E ta splica cu carnaval a nace for di religion, caminda ta bay celebra epoca di carnaval y despues ta bin e parti penitencia, e parti religioso.
Si bin cambio, con esaki lo ta hinca den otro. Mester tene cuenta riba diferente actividad, carnaval lo bira mas largo of cortico y hopi punto mas. Carnaval tin su epoca y tur hende ta respeta esaki, manera tin epoca di drag race, baseball, futbol, y tur sorto di deporta ta wara carnaval pasa pa por organisa nan actividad. Por ta esey lo stroba esaki. Sa cu e tempo ey hubentud na Aruba no ta train e tempo, carnaval ta tempo di celebra y por ta nan no lo tin disciplina pa cuida.
Da Silva a bisa cu e temporada ey tambe lo tin Weganan Olimpico na Tokyo. Esey lo por kita e atencion di hende pa mira carnaval, pasobra tin cu lo desea di keda cas y mira e deportenan. Pa cambia esaki lo ta bon, pasobra lo busca un temporada sano pa haci esaki. Tin cu mira algun cos rond di dje y algun hende no lo gusa esaki.
Di tin carnaval na cualkier momento pa un bon carnavalista esey ta bon. Pa motibo di e situacion actual, mester enfoca riba e miho momento y tin cu pensa riba sponsornan. Tin cu mira si e sponsor ta prepara pa tuma e reto grandi aki. Segun Deninah Martina, representante di Pink 4 Life Carnival Group, mester tin cu mira pa ta bon representa riba caminda tambe y kico e sponsor ta bisa. Carnaval ta mara na un religion, pasobra ta tene esaki 40 dia prome cu cuaresma, kier caba esaki riba un diamars pasobra diaranson ta dia di shinishi.
Juli ta e temporada cu hopi hende kier bay vakantie ya cu e yiunan ta di vakantie. Tur esaki ta hungando un rol na e momentonan aki. No a tuma niun decision ainda cu e carnaval lo ta na juli. Lo tin un reunion entre Gruponan Uni y SMAC pa mira si e decision cu ta pensando lo ta bon.
Martina a bisa cu e ta prefera pa pone carnaval den otro temporada, manera mei. Esaki ta pasobra juli hopi hende ta bay cu vakantie, kendenan ta hendenan cu ta contribui na carnaval. Tambe si haci carnaval mester puntra cuanto tempo lo duna esaki, pasobra na comienso di aña esaki lo bay te cu 3 luna.
