Apesar di e situacion cu a surgi awo, AHATA ainda no a cambia su proyeccion di 40% di ocupacion di cambernan di hotel pa fin di aña. Esaki ta loke cu CEO y Presidente di Aruba Hotel and Tourism Association Tisa LaSorte a bisa den declaracion duna na 24ora.com
E ehecutivo di AHATA a papia riba e situacion reinante na Aruba awo y kico e ta nifica pa turismo y Aruba. Pa cuminsa, e di dos ola di coronavirus na Aruba, despues cu a yega na cero caso, ta simplemente pa falta di disciplina cu a yega na e fase aki. E bon ta cu mayoria caso ta sintomanan leve y ta tumando e pasonan caba pa wanta e brote aki mas lihe posibel.
Pero no por nenga cu e cantidad di casonan nobo ta creando cierto miedo cerca personanan cu tin pensa di bishita Aruba. E ta conseha pa Aruba mantene su mes firme na e protocolnan, e testmento na aeropuerto pa esnan cu no tin nan resultado cu nan, y sigui regla pa contene e brote mas lihe posibel. Tur esaki ta necesario pa haya e ayudo financiero asina necesario pa Aruba. Ainda falta mas cu mey biyon florin, sin sa kico e necesidadnan di otro aña lo ta.
Den su declaracion tambe el a papia di reforma fiscal cu ta necesario ya cu e ta duna companianan e opcion pa haci restructuracion pa mantene cierto cuponan di trabou toch y sin cu nan mester cera nan portanan. Hasta kisas por haci cambio den e “business model”. Den tur esaki, no mester lubida cu mester crea un fondo pa yuda esnan cu perde nan trabou den e crisis di COVID-19.
Mester ta realistico y mira cu aworaki ta manteniendo e economia den forma artificial door di e subsidionan cu ta ricibi. “Por lo pronto e economia no ta bay drecha riba su mes. Ta keda cu e necesidad di subsidio y reforma fiscal, te ora cu e economia lanta cabes. E ta un trayecto largo pa yega ne punto cu por mantene e economia sin subsidio y sin reformanan fiscal.”
Apesar di e di dos brote, AHATA te ainda no a yega na e punto pa cambia nan proyeccion. A haci e proyeccion aki recientemente, ora cu a prepara pa apertura di frontera. No ta mira e necesidad ainda pa cambia esaki. Esta cu ta calcula pa fin di november, cuminsamento di december ta yega na 40% di ocupacion di cambernan di hotel. Esaki apesar cu e di dos brote a trece basta cancelacion bou di e personanan cu kier biaha awo.
