AHATA: Na November ocupacion a baha un tiki

Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna. Pa luna di November 2019 e CEO di AHATA Tisa LaSorte a anuncia cu e resultado di November ta mustra cu ocupacion ainda ta nivelando.

Den ultimo dos añanan Aruba a experiencia crecemento consistente den ocupacion desde horcannan di September 2017. Pa motibo di e extra demanda pa nos isla, por a cobra prijsnan mas halto. Na November 2019, e ocupacion tabata un tiki mas abou cu November 2018, reduciendo cu 0.8 punto pa yega 85.3%. High season ta acercando y November su ocupacion tabata 7 punto mas halto cu October 2019. E balor averahe di cada camber (ADR) a crece cu 5.2% compara cu November aña pasa, yegando $234.28. E RevPAR, cu ta e entrada averahe pa tur camber disponibel, na November 2019 tabata $199.94, cu ta un aumento di 4.3% compara cu un aña pasa. Por nota cu e crecemento den RevPar a cuminsa nivela tambe.

Si compara e resultado di e prome 11 luna di 2019 cu e mesun temporada di aña 2018 ta nota cu ocupacion a subi un tiki cu 1 punto, pa un averahe di 85%. ADR a crece cu 6.7% y RevPAR a crece cu 7.9%.

Mientras cu mas inventario ta sigi habri bek den region Caribense, e crecemento di demanda pa Aruba por ta nivelando. Si e trayectoria aki sigui, e prijsnan di camber lo cuminsa baha bek pocopoco. Mientrastanto, tin expectativa cu aña 2019 lo caba cu cifra positivo pa turismo di Aruba.

E cifranan di AHATA ta basa riba 17 hotel miembro: Amsterdam Manor Beach Resort, Barceló Aruba, Boardwalk Hotel, Brickell Bay Beach Club, Bucuti & Tara Beach Resort, Courtyard by Marriott Resort, Divi & Tamarijn All-Inclusive, Eagle Aruba Resort, Holiday Inn Resort Aruba, Hyatt Regency Aruba, Manchebo Beach Resort, Marriott Aruba & Stellaris Casino, Renaissance Aruba Resort, The Ritz-Carlton Aruba, Riu Palace Aruba, Riu Palace Antillas y Talk of the Town Hotel.