Aruba Hotel & Tourism Association (AHATA) a publica cifranan di ocupacion y prijs di hotelnan pa luna di October 2018. E porcentahe averahe di ocupacion di hotel (Occupancy Rate) tabata 79.2%, un caida di 6.2punto compara cu October aña pasa. Di otro banda e balor di camber ta sigui ta mas halto cu aña pasa. ADR (Average Daily Rate – e prijs averahe pa cada camber bendi) a subi 12% compara cu aña pasa pa $215.58. RevPAR (e entrada averahe pa tur camber disponibel) tabata $170.66 na October 2018, un aumento di 3.9% compara cu un aña pasa.
Esaki ta nifica cu aunke e cantidad di turista kedando na hotel ta menos, e hotelnan l a logra cobra mas pa e cambernan. E luna di October tabatin un ocupacion un tiki mas halto cu esun di September, locual ta un patronchi normal.
Pa e prome 10 lunanan di 2018 compara cu mesun temporada na 2017, a logra un aumento den RevPAR di 11.5% pa un averahe di $206.34, pero ocupacion a baha un tiki cu 0.5% na un averahe di 84.9%.
Tisa LaSorte di AHATA ta splica cu por mira e cifranan cuminsa normalisa despues cu e ultimo 12 lunanan Aruba a beneficia di e cantidad di hotelnan cera den region Caribe pa motibo di daño di horcan na September 2017. Aunke cu ainda ta cobra un prijs mas halto pa cada camber, e crecemento den prijs a cuminsa reduci. Ta importante pa Aruba sigui mercadea efectivamente y pa nos isla por mantene un bon demanda como destinacion, locual lo yena cambernan y influencia un RevPAR mas halto.
E cifranan ta basa riba 15 hotel: Barcelo Aruba, Boardwalk Hotel, Brickell Bay Beach Club, Bucuti & Tara Beach Resort, Divi & Tamarijn All-Inclusive, Hyatt Regency Aruba, Manchebo Beach Resort, Marriott Aruba & Stellaris Casino, The Mill Resort, Renaissance Aruba Resort, The Ritz-Carlton, RIU Palace, RIU Antillas, Talk of the Town Hotel y Tropicana Aruba Resort.
