Riba invitacion di Minister di Turismo, Salubridad Publico, y Deporte, Aruba Hotel & Tourism Association (AHATA) a reuni cu Ministerio di Salubridad, DVG, y Aruba Tourism Authority. Durante e reunion a expresa cual preocupacion ta reina den cada seno y a discuti loke e expertonan di sector publico ta trahando riba dje pa finalisa un plan pa reapertura di Aruba su turismo.
Tur ta di acuerdo cu ta importante pa Aruba por habri frontera pa nos economia por lanta bek y pa tin entrada di divisas. Tur ta di acuerdo tambe cu ta importante pa tin un plan pa minimalisa e importacion di caso nobo di COVID-19 y pa sigura cu un segundo ola ta manehabel pa nos infrastructura di salubridad. AHATA a ricibi siguransa cu autoridadnan di Aruba ta finalisando nan analisis y plan pa apertura di frontera cu tur cautela. Reunionnan lo continua y DVG lo sigui cu su disponibilidad pa duna informacion, guia y dialogo. AHATA a aprecia e invitacion pa e reunion y ta aprecia cu lo sigui cu dialogo den e dianan nos dilanti.
