Maroon 5 den Curaçao North Sea Jazz 2019

Ku gran orguyo nos por hasi menshon di e promé nòmbernan anunsiá den e aliniashon anterior i konfirmá pa e di nuebe edishon di Curaçao North Sea Jazz Festival. E aña akí, lo inkluí e siguiente artistanan: Maroon 5, Ozuna, Gladys Knight i e banda The Third World nan aparishon den festival na World Trade Center na Piscadera Bay.

E organisashon ta trahando ainda riba e otro artistanan, ku nos lo anunsiá debidamente den e lunanan venidero. E Festival lo start sali riba djaweps 29 di ougùstùs ku konsiertonan grátis di: Havana D’ Primera i Aymee Nuviola.


E banda merikano Maroon 5 a bende mas di 20 mion álbum musikal i a gana tres premio Grammy. E promé álbum Songs about Jane a yega na tòp den un tempu rèkort, dor di su aseptashon general di públiko. E disko ku a siguié titulá:  It won’t be Soon Before Long a alkansá mihó resultado ainda ku a superá e éksitonan anterior. Tabatin hopi otro éksito mas manera: Harder To Breathe, This Love, She Will Be Loved, Makes me Wonder, Moves Like Jagger, ku Christina Aguilera… e lista di éksito ta bira muchu mas largu. E último álbum Red Pill Blues a  mira lus na fin di aña 2017 i tabata kontené komo number un e pieza Girls like you ku Cardi B.  E agrupashon Maroon 5 tabatin e honor na yanὕari pasá pa aktuá durante Super bowl Show den e programa durante di intermedio.


Juan Carlos Ozuna Rosado, simplemente konosí pa su fam Ozuna, ta un kantante portorikeño, di e estilo reggaetón i di e género “latin trap”. Na prinsipio di aña 2016 el a bira konosí i famoso ku e piesa musikal La Ocasión i despues el a kontinuá su karera musikal di un manera eksitoso. El a emití dos álbum: Odisea na aña 2017 i Aura na aña 2018. Además de eseinan el a gana entre otro dos galardon di e organisashon prestigioso Billboard Music Awards i tres galardon di Latin American Music Awards, tambe el a debutá na aña 2017 komo aktor den e  pelíkula Que León.

Seis aña despues ku el a hasi su debut na Kòrsou e ‘Emperatris di Soul’, Gladys Knight ta bini bèk riba tarima di Festival di Jazz riba nos isla. Ku su grupo The Pips el a anotá éksito tras di otro éksito spesialmente den añanan ’60 i ’70 ku e piesanan I Heard It Through The Grapevine, Midnight Train To Georgia i Baby Don’t Change Your Mind.  Na final di añanan ’80, Knight a kontinuá individualmente komo solista i a kosechá direktamente gran éksito ku e kansion di e pelíkula di James Bond License To Kill. Na aña 2014 su álbum mas resien a mira lus di dia titulá: Where My Heart Belongs, un álbum di kansionnan di Gospel ku un originalidat i outentisidat kaminda por skucha tambe e bosnan di e agrupashon The Pips. Entretanto Knight a risibí shete galardon Grammy ademas di esei un múltiple di otro galardon mas na su nòmber.  

E banda musikal hamaikino Third World a selebrá aña pasá un bes mas su grandioso eksistensia di 45 aña. Nan a yama nan mes e ‘Embahadornan di Reggae’ i nan ta deskribí nan zonido komo ‘reggae fusion’ (fushon di reggae); ya ku e banda ta produsí un meskla di reggae ku otro género manera e ritmonan: soul, funk i disco.  Nan mayor éksito te na e momentonan ei tabata Now That We Found Love for di aña 1978. E éksito akí tabatin komo resultado ku e banda akí a bai biaha rònt mundu ku e konsekuensia ku nan a optené no ménos ku dies nominashon pa Grammy. Nan último disko sengel ku e título Loving You Is Easy tabata bou di produkshon di Damian Marley i a sali mas na kuminsamentu di e aña akí.


E banda kubano di timba Havana D’Primera a keda fundá na aña 2008 pa Alexander Abreu i tabata un formashon di un kolektividat i konglomorashon di músiko prosedente di e mundu musikal kubano, ku tabata konta ku na tur 17 miembro musikal. Abreu ta ser konsiderá komo un di e mihó trompetistanan di su generashon i ademas di esei e ta un kompositor talentoso, kantante i direktor di orkesta. Ku su meskla ku ta integrá e ritmonan di Salsa, Jazz, Funk i e ritmo musikal Afro-Cubano, e  banda menshoná akí ya a saka kuater álbum di studio di grabashon. Su último disko, Cantor Del Pueblo di aña 2018, tabatin komo resultado su di dos nominashon pa e Latin Grammy komo e Mihó Album di Salsa.

Aymee Nuviola, ku ta ser yamá kariñosamente La Sonera del Mundo’ ta un kantante respetá di Cuba ku a sigui su estudionan  musikal na Conservatorio Manuel Saumell na La Havana. Nuviola ta un di e streanan di mas grandi di awendia na Cuba i hasta inkluso el a graba tambe un kansion ku e leyenda musikal merikano Jackson Browne. Komo kantante hóben Nuviola a muda bai e siudat di Miami, kaminda su kareda komo kantante solista realmente a haña su kuminsamentu. Na aña 2015 el a risibí un nominashon pa un Grammy komo resultado di su promé álbum First Class to Havana.  Aña pasá Aymee a gana su promé Latin Grammy Award pa su álbum ku el a saka titulá: Como anillo al dedo edishon di aña 2017.