Agregado militar di Venezuela na Merca ta desconoce Nicolas Maduro

E agregado di Defensa di Venezuela na Washington, coronel Jose Luis Silva, a bisa cu e ta desconoce Nicolas Maduro como presidente legitimo di e pais y a pidi su “rumannan militar” pa respalda e hefe di Parlamento, Juan Guaido, como mandatario interino, el a declara na AFP diasabra.

“E agregaduria di Defensa aki no ta reconoce presidente Nicolas Maduro door di consider’e un usurpador y ta reconoce Juan Guaido como presidente interino legitimo,” el a bisa.” E posicion aki ta apega na e Constitucion y leynan di Venezuela y mi ta haci un yamado na mi rumanna militar pa uni na e respaldo di Guaido,” el a añadi.

“Nos mester tin e responsabilidad institucional di apoy’e pasobra ta e unico manera di sali for di esaki.” “Esaki apenas ta cuminsando,” el a agrega, enfatisando cu e kier “un cambio” pa su pais. Silva, diplomatico militar di e rango di mas halto di Venezuela na Merca, a bisa cu el a papia cu su superiornan na Caracas pa informa nan di su decision.

“Mi a comunica cu mi superiornan y nan sa cu mi no ta di acuerdo cu loke ta pasando, cu e usurpacion di poder, maltrato di hende  e situacion di pobresa extremo di un pais asina rico den recurso humano y natural manera ta Venezuela,” el a señala.

Silva a bisa cu el a papia diasabra mainta cu Guaido pa pone su mes na su ordo. “Mia bise cu mi kier mi pais, cu mi ta admir’e pa e trabao cu e ta haciendo, pa tin e boluntad pa bisa e gobierno aki cu ta ilegitimo,” el a conta, subrayando cu el a tuma e caminda aki pa ta “na banda di pueblo y di ley.”

E militar a se±ala cu e combersacion cu Guaido tabata entre dos persona cu kier “bienestar” di su pais. “No ta pa “Abo kita pa ami drenta.” Presidente Guaido tin su ruta di trabao, cu ta consisti den e paro di e usurpacion y den eleccionnan liber y transparente,” Silva a bisa.