Agentenan di siguridad na Corsou no ta safe den nan trabou

Tin un situacion cu no ta bon pa hendenan cu ta traha den siguridad (security) na Corsou. Marlon Regales, vocero Fundashon Ban Hunto Corsou a expresa cu tin mas influencia ta bin di afo. Esaki ta pa motibo di e situacion economico rond di nan, specialmente di Venezuela. Ta mira cu criminalidad ta subi drasticamente. Nan ta yega na Corsou tambe.

 

Pa medio di diferente rason e hubentud a bira mas violento, nan a perde respet, asina el a expresa. Mester bin un sistema pa tur hende di siguridad bini hunto pa lanta e nivel di salubridad. No por ta asina cu ta coy ken cu ta y pone unda cu ta, haci kico cu ta, cobra placa y yama bo mes siguridad. E definicion di siguridad ta pa proteha y trece trankilidad y confiansa den comunidad.

 

Un persona cu ta traha den e parti di proteha, trece trankilidad of laga un hende sinti su mes comodo, e persona ta un agente di siguridad. No por laga un hende para su so y pone su mes na peliger. No por expone su mes na peliger, unda ta lag’e sinta bou palo, gewoon  porta afo, cu soño of ta cabisha henter anochi. Tin mucha cu ta pasa ranca porta for di nan. Tambe a desarma algun agentenan di siguridad, tin otronan cu a ricibi maltrato. “Si bo no bin cu un sistema mas profesional, adapta na e tempo di awo, lo bo mira hopi hende ta sufri”.

 

E consecuencia grandi ta cu for di ora a asesina un hende of maltrata, e cos a bay den media, ta mira tur otro agente di siguridad tambe tin casa, mama, tata y yiu. “Por imagina bo cu a mata un agente di siguridad, bo ta yiu y bo tata ta agente di siguridad y e tin cu bay subi warda awe nochi. Bo ta kere cu e mucha por drumi? Lanta mainta y bay trankil scol? Sigur cu no,” Marlon Regales a sigui bisa. Henter e famia ta den panico. Un gremio rond di cada agente di siguridad y sigur awo ta hiba 2000 na Corsou, ta bou di stress pa motibo cu nan famia ta eherce e funcion ey.

 

Tin cu bin un sistema di regula. Gobierno mester pone standardnan, acredita hende pa nan por ta den siguridad. Manera tin pa core auto, taxi, bus of haya un vaarbewijs pa core boto, gobierno mester acredita e persona. Asina ta haci na Corsou y ora mira cu aeropuerto haci eseynan of hotelnan di nivel halto, pasobra nan ta cumpli cu e standardnan internacional. Esey ta un mester, pasobra nan ta exigencianan. Gobierno mes mester pone e standardnan pa acredita.

 

Regales ta sigui bisa cu ta imposibel pa yega un nightclub, un persona ta foullering y bo no sa ken e persona ta. No por laga un hende cuida bo pa trece proteccion, confiansa y e hende no ta acredita. “Nos tin cu subi nos nivel di siguridad y nos por haci’e facilmente. Gobierno tin cu pone e leynan di acreditacion y controla nan.” Defensa por yuda nan, Rode Kruis tambe por yuda cu e parti di EHBO, na Corsou tin expertonan di siguridad cu ta monitoria esunnan cu si ta cumpli cu e manera. Cuerpo Policial tambe por yuda. Hopi hende por trece nan conocemento hunto y pone e standardnan pa duna hendenan un acreditacion despues cu nan pasa e opleiding. Ken cu ta por duna les, pero ora di pasa e test mester cumpli cu e conocemento, experencia, habilidad pa atende como agente di siguridad.