Afpakteam a tuma suma grandi di placa den beslag

Riba dia 2 di augustus ultimo, Duaneronan na aeropuerto internacional Reina Beatrix, a atende un homber di 56 aña di edad, procedente di China, pero biba na Aruba, cu tabata purbando pa biaha pa China.

Prome cu el a baha, e pasahero a pasa na oficina di Duana pa duna cuenta di un suma di placa cu e lo biaha cune. Ora a atende for di unda e placa efectivo aki a bin, a surgi preguntanan cerca e Duaneronan, cu a opta e ora pa envolvi e Integraal Afpakteam Aruba. Despues di evaluacion, a opta pa Duana controla e pasahero aki miho. Ora a conta e placa, a resulta cu ta un suma grandi di US$ 116,510,=. Mirando e declaracion di e pasahero haci na Aeropuerto, riba procedencia di e placa, a opta pa detene y entreg'e na Integraal Afpakteam bou sospecho di labamento di placa. "Integraal Afpakteam Aruba" ta un cooperacion entre miembronan di Cuerpo Policial Aruba, Ministerio Publico, Servicio di Impuesto, Cuerpo di Aduana y Kustwacht. Tambe nos ta traha den cooperacion masha estrecho cu RST, FIU/MOT y e "Fusion Centre". Hunto nos ta para mas duro, hunto nos ta forma un solo mokete: No por premia criminalidad! Bo tambe ta dispuesto pa coopera?