E organisacion di sector di cuminda y bebida, AF&BA ta adverti su miembronan, otro operadornan y publico en general pa tene cautela y respeta e protocolnan estableci pa DVG y crisis team durante dianan di fiesta.
E Asociacion ta contento cu Aruba a wordo declara code geel, pero ta adverti cu ta importante pa tene e curva abou tambe y asina evita cu nos lo encontra un tercer ola di COVID.
E asociacion ta consciente cu hopi negoshi toch kier celebra e fin di aña cu personal of famia y tambe ta consciente cu e temporada aki pa e sector ta uno unda nan servicionan ta sumamente solicita. Ya cu un cu otro por guia na aglomeracion di hopi hende den mesun area of ariba un pista di baile, ta urgi publico pa ta mas conservativo y pa operadornan tambe standarisa e cantidad di persona cu por wordo sirbi.
AF&BA recientemente a cera un acuerdo pa e maneho di su Dine Around cu Webtech Aruba unda un recomendacion lo ta pa negoshi cumpra un Gift Certificate via e website www.arubadining.com. AF&BA ta encurasha negoshinan cu tradicionalmente tabata organisa un Cena di Pasco pa cumpra gift certificate pa nan personal asina cu esakinan por Sali disfruta di un bunita cena na un di e restaurantnan cu ta afilia y cu Aruba Dining.
Di e forma aki AF&BA kier percura cu den e dianan di fiesta binidero publico y operadornan por contribui na tene e cantidad di casonan abou y evita asina un tercer ola di COVID. AF&BA ta desea Aruba feliz dianan di fiesta.
