Cuminsando e siman aki U.S. Customs and Border Protection (U.S. CBP) a duna inicio na un proyecto piloto unda ta haci uso di e sistema biometrico na Aeropuerto Internacional Reina Beatrix (Aeropuerto di Aruba).
E lo ensera e uso di tecnologia di reconocimento biometrico facial pa verifica e identidadnan di e biaheronan cu ta bai bek pa Merca for di Aruba. E proyecto piloto lo wordo getest cu pasaheronan riba e buelo di Delta pa John F. Kennedy International Airport, cu ta opera diariamente. Despues di e implementacion exitoso door di U.S. CBP di e proyecto piloto di reconocemento biometrico na diferente aeropuerto Mericano, U.S. CBP a scohe aeropuerto di Aruba como e prome aeropuerto pafo di Merca pa haci e test di e tecnologia di reconocimento biometrico facial. Mescos cu e implementacionnan anterior di e tecnologia aki, pasaheronan ta ancioso pa participa den U.S. CBP su proceso di entrada/salida inovativo.
“Nos ta hopi contento cu U.S. CBP a scohe pa haci e proyecto piloto di e tecnologia aki na Aeropuerto di Aruba. Nos a haci uso di e tecnologia aki e ultimo anjanan na diferente punto di control di frontera na aeropuerto, y e proyecto piloto aki lo ta instrumental pa hiba nos aeropuerto na e siguiente nivel di seguridad y servicio na e pasahero; y pone nos riba e rumbo pa bira un di e mihor aeropuertonan cu ta ofrece U.S. pre-clearance. Nos experiencia cu e sistema biometrico tabata hopi exitoso den pasado y nos ta ansioso pa por traha den colaboracion cu U.S. CBP riba e proyecto piloto, y nos ta spera cu nan lo ta exitoso den implementa e tecnologia aki den su totalidad,” asina CEO di Aruba Airport Authority N.V., Sr. James Fazio a bisa.
