Aruba Airport Authority N.V. (AAA) a habri aña cu manganan hisa ariba pa procesa mas cu 25.000 pasahero cu a biaha durante e periodo di 2 dia, cu ta diasabra 5 y diadomingo 6 di Januari 2019. Segun cifranan oficial ricibi for di IASA pa loke ta e cantidad di pasahero, 14.400 pasahero a biaha riba diasabra y 10.631 riba diadomingo.
Aeropuerto di Aruba hunto cu tur stakeholder operacional tabata bon prepara cu suficiente personal pa e fin di siman druk. Varios cambio operacional a wordo haci pa yuda alivia e congestionnan cu a yuda haci e fluho di pasahero bai mas liher. Pasaheronan cu a yega aeropuerto segun e conseho usual pa ta na aeropuerto 3 ora prome cu e salida di nan buelo a yega gate basta prome cu momento di aborda avion y por a asta shop y come prome cu nan buelo.
Durante full e periodo peak, e pasaheronan tabata wordo “timed” na cada checkpoint di aeropuerto, for di momento di check-in te ora cu nan a yega gate. E cantidad di rato maximo pa un pasahero durante e momentonan di mas druk tabata net un tiki mas cu 2ora pa pasaheronan cu a biaha pa Merca, y esaki a dura un paar di ora. Aunke cu tabatin liñanan hopi largo, tur stakeholder tabata presente y envolvi den e operacion, pa asina e liñanan keda move.
Aeropuerto a tuma nota di un post lamentabel riba Trip Advisor, unda un pasahero ta bisa cu a tard’e 4 ora y mei pa yega su buelo. Na ningun momento durante e fin di siman druk, tabatin condicionnan asina pa niun pasahero. AAA ta tuma tur feedback hopi na serio y inmediatamente a cuminsa cu investigacion pa haña sa kico a pasa, mirando cu e no a cuadra cu ningun observacion haci durante e fin di siman. E investigacion a mustra cu varios pasahero a perde e buelo cu ta wordo menciona pa motibo cu 30 minuut prome cu nan buelo nan a yega e prome punto di control prome cu drenta paden na imigracion, pues demasiado laat pa por subi nan buelo pa Merca.
“E volumen di pasahero durante e fin di siman tabatin su retonan cu ne y e abundancia di bon trabou den ekipo y coordinacion entre tur partner a haci un diferencia grandi. E cantidad di pasahero manera cu nos a experencia durante e fin di siman por bira loke nos por spera pa un tempo nos dilanti y nos tur ta comprometi pa keda enfoca y sigui haci e inversionnan necesario den aeropuerto cu lo duna nos mihor ekipo pa maneha cantidad mas grandi di pasahero den future,” asina CEO di AAA Sr. James Fazio cu ta hopi satisfecho cu e procesamento di pasahero durante e dianan di mas druk di aña a bisa. Pa loke ta trata e review riba trip advisor, Sr. Fazio a bisa lo siguiente: “E experiencia di e pasahero pa nos ta di suma importancia y ta duel nos pa scucha cu un pasahero a perde su buelo na Aeropuerto di Aruba. For di e perspectiva di aeropuerto, nos a percura pa tin tur personanan clave na aeropuerto pa por garantisa un procesamento di pasahero mas eficiente posibel den e situacion extraordinario aki.”
Si ta Super Weekend of no, e conseho di biahamento ta keda mescos: Tur pasahero mester ta na aeropuerto 3 ora prome cu e ora di salida di buelo pa evita cualkier inconveniencia.
