Aeropuerto di Aruba a gana “Route Exchange Award 2020”

Aeropuerto Internacional Reina Beatrix a ricibi recientemente un premio nobo “Route Exchange Award at Routes Americas 2020”, cu ta reconoce nan excelencia den e esfuersonan den marketing digital y e participacion di e aerolineanan a traves di Route Exchange Platform. “Nos ta profundamente honra di gana e First Routes Exchange Award 2020 den e forum di  Desaroyo di Ruta pa America!”, asina Jo-Anne Meaux-Arends, den su calidad di Air Service Development Manager na Aruba Airport Authority N.V., a duna di conoce.

E ekipo comercial y di mercadeo (Air Service Development & PR)  ta contento cu e premio aki – y e hecho cu e aerolineanan excepcional asocia y e organisacion di Routes Americas a reconoce e ekipo su trabou duro, dedicacion, innovacion y diversidad di acceso den henter America. E exito di e ekipo aki realmente ta e sinergia creativo, e clima di diversidad cultiva den unidad pa por obtene y mantene un bentaha diferencial competitivo. Door di participa y conecta cu e doelgroep di Aeropuerto di Aruba a traves di diferente tipo di plataforma di comunicacion. 

Routes a demostra di ta un adkisicion valioso pa complimenta e strategia di desaroyo di servicio aereo di Aeropuerto di Aruba. E evento a brinda Aeropuerto di Aruba un acceso incomparabel na mas di 20 aerolinea y ‘decision makers’, dunando e ekipo di Aeropuerto di Aruba un plataforma adicional pa mustra tur e casonan den desaroyo di e rutanan.