Cu un mayoria limita di votonan den Parlamento, a reeligi mr. Ady Thijsen como Presidente di Parlamento pa e Aña Parlamentario 2019-2020. Mesun cos ta conta pa Allan Howell, cu tambe lo sigui den e funcion di Vice Presidente di Parlamento pa e Aña Parlamentario cu ta cuminsa mañan diamars.
Mester menciona cu di e 12 votonan di coalicion, solamente 11 a sostene e candidatura di Thijsen y Howell. Esey pa motibo cu Parlamentario Edgard Vrolijk no a presenta awe na trabou pa cera Aña Parlamentario 2018-2019. Den oposicion tambe a keda falta Arthur Dowers. Como tal e votacoin na final a sali 11 voto pro y 7 voto contra e postulacion di ambos candidato.
Mester menciona cu e Fraccion di AVP a vota pa Mervin Wyatt bira Presidente y Michael Lampe bira Vice Presidente di Parlamento. E sosten sinembargo tabata di solamente 7 voto, pues no suficiente pa por “gana” den votonan di sosten, banda di e 11 votonan “pro” di e coalicion MEP, POR y RED.
