Ady Thijsen practicando conflicto di interes cu placa di Parlamento!

Recientemente mr. Ady Thijsen, actual Presidente di Parlamento di Aruba, a opta pa apela e sentencia di Corte den Prome Instante cu el a perde contra Nelson “Speed” Andrade di 24ora.com. El a cambia abogado mr. Nancy Gravenstijn pa su amigo mr. Gabri de Hoogd. Pero manera tabata mustra, e dosnan ey ta mucho mas cu djis amigo, nan ta posiblemente socio/colega, locual ta mustra den un conflicto di interes!

For di diferente fuente den e ramo di abogacia nos a haya confirmacion cu Ady Thijsen ta(bata) traha na e bufete James Martin & Associates, situa riba L.G. Smith Boulevard # 50, unda antes tabata bufete di abogadonan Gomez & Bikker. Tur esaki, siendo cu nunca el a declara esaki na Parlamento pa corta su salario. Mester menciona cu den pasado abogadonan Andin Bikker y Evelyn Wever si a haci esaki, mescos dokter Maikel Kelly di MEP cu e tempo aya tambe a declara su entrada extra pa a baha su salario como Parlamentario.

Riba website di e bufete di abogado James Martin & Associates ta para bon cla cu Ady Thijsen ta miembro di nan ekipo di abogadonan!

Claro cu si tabata den sector priva, scoge pa traha cu Bo amigo of socio lo no tabata ningun problema. Pero como sirbido di pueblo, uzando placa di pueblo, ta scoge sin mas pa paga un bufete di abogado unda Abo mes ta(bata) traha ta un conflicto di interes y ta mustra un fayo barbaro den reglanan di bon gobernacion y etica. E hecho cu kisas no ta traha na e bufete ey mas no ta suficiente pa kita e “percepcion” cu aki ta trata di un ayudo na un bufete di “cas”.

Lamentablemente e miembronan di e “Commissie Huishoudelijke Aangelegenheden”, CHA, esta Rocco Tjon (MEP), Marlon Sneek (AVP), Ricardo Croes (RED) y Marisol Lopez (POR), no lo a cay riba e conflicto aki y a duna e Presidente aprobacion pa traha cu su mesun bufete di abogado den su caso di apelacion. E Griffier nobo di Parlamento, mr. Hermen Hek, cu ta responsabel pa aspectonan financiero di Parlamento, tampoco lo a cay riba e tema delicado aki.

Cu ta promove Ady Thijsen riba website di e Bufete di abogadonan James Martin & Associates ta motibo suficiente pa nos denuncia conflicto di interes y spera cu e “Bureau Integriteit” cu Gobierno ta promoviendo, lo sa di tuma esaki na cuenta.

Kisas un punto di atencion pa personal di Vertegenwoordiging di Nederland in Oranjestad (VNO) tuma nota di dje pa ora cu Parlamentarionan di Tweede Kamer y Eerste Kamer bishita Aruba.

Ta keda un pregunta si Ady Thijsen lo por keda mes como Presidente di Parlamento si e ta practicando conflicto di interes cu placa di Parlamento!