Parlamento tabata tin un aña hopi pisa, en particular pa loke ta trata ley di LAft. Presidente di parlamento, Ady Thijsen a indica cu esey a pone hopi presion riba nan. Ta algo cu ta hopi importante, mirando relacionnan den reino. Esey a trece cun’e tambe cu cierto puntonan mester wordo atendi.
E reunionnan publico normal a bay bon. E comisionnan tambe a traha bon hunto. Por bisa si, cu pa loke ta trata responsabilidad cu parlamento ta carga pa loke ta trata trabaonan den reino, manera reunionnan di IPKO y reunionnan di Parlatino, tambe tabata hopi importante pa Parlamento y vooral esun di Hulanda. Tur e reunionnan cu nan a atende na Hulanda, tabata den cuadro di geschillenregeling, den cuadro di IPKO tambe, cual tabata un tarea hopi grandi. Parlamento ta asumi un responsabilidad grandi y mester percura tambe pa loke ta trata nan posicion den reino.
Respet di oposicion y coalicion
Thijsen a remarca cu e decisionnan tuma den cuadro di reino, tin hopi influencia riba e paisnan. Y den e caso aki, pais Aruba. Un biaha mas, Thijsen por bisa cu e ta contento di por a haya e sosten y e respet parlamentario. E ta conta tanto pa coalicion y oposicion. Pa por funciona bon como presidente di Parlamento, mester por tin e respet di e coleganan, irespecto e diferencianan di opinion.
E tarea di e presidente di Parlamento ta, cu e mester keda obhetivo, neutral. Den e caso aki tin cu duna tur parlamentario tambe e respet y tambe e oportunidad y espacio, pa nan por trece dilanti loke nan ta kere cu ta lo corecto. Ta importante pa tin e respet di oposicion tambe, mescos cu coalicion. Ta algo cu no ta hay’e facil. Bo no ta haya respet na un manera dictatorial, sino bo ta hay’e di con bo ta trata cu hende.
Tin biaha cos ta bay hopi skerpi, pero esey ta na su luga. Segun Thijsen, esey no ta un problema. E ta kere cu e tempo a bay hopi lihe. E trabaonan a wordo haci.
E aña cu ta bay bin, ta uno hopi importante. Awo ta bay independisa Parlamento. E proceso eynan posiblemente lo ta cla na 2020. Ta bay tin cambio, pasobra lo hala Parlamento mas leu di gobierno den cuadro di Trais Politica. Algemene Rekenkamer, Raad van Advies y aki djis Ombudsman lo bay keda cla tambe. Cua signatura politico cu bin, cua color politico cu ta den gobierno, segun Thijsen semper Parlamento ta e curason di democracia, caminda e decisionnan y control ta tuma luga. Thijsen ta contento cu ta haya e sosten. Pa por traha como presidente di Parlamento no ta facil. Ora cu hende duna e sosten aki, e respet, e ta mustra cu bo ta haciendo toch un bon trabao.
