Asina mes, manera Bo ta lesa, ta asina mes e Presidente di Parlamento a grita pafo di sala di Corte, riba e plenchi, na momento cu Nelson Andrade y Patrick Paskel tabata canando pa subi auto. “Cera Boso ta bay. Nos ta bay cera Boso!”. E gritonan aki a tuma luga dilanti dos señora para banda di dje y Vice Presidente di Parlamento, Allan Howell.
Cu e expresion aki ta mas cla awor cu henter e carta pa nenga entrada di Nelson “Speed” Andrade den edificio di Parlamento ta nada mas cu un persecucion politico.
E fraccionnan MEP, RED y POR a unico aki pa haci tur lo posibel pa stroba libertad di prensa riba nos pais y tin den nan plan pa purba cera periodistanan cu tin un opinion diferente na esun di nan.
E mesun Presidente di Parlamento a confirma esaki awe ora den su rabia, basa riba con malo e caso sumario a bay pe durante tratamento di e caso den Corte, a haya ta bon pa grita e periodistanan cu lo percura pa cera nan pasobra ta “ladron” nan ta.
Claro cu un keho internacional lo sali awor, pasobra ambos, mescos nos compania Headlines Group, cas editorial di 24ora.com, ta afilia na Sociedad Interamericana di Prensa. Lo laga nan sa cu na Aruba e funcion di periodista, desde cambio di gobernacion, ta bou presion enorme dor di e Gobierno nobo. For di encarcelacion inhusto di Marko Espinoza, na nenga entrada di Andrade den Parlamento y awo na e menasa cu lo laga cera Andrade y Paskel, dor di e Presidente di e “organo mas halto di nos pais”.
