Ady Thijsen (MEP): “Si Gobierno mester cay, e ta cay”

Presidente di Parlamento Ady Thijsen den un declaracion na prensa, a splica kico tabata su rol den henter e procedura pa yama un reunion pa baha un minister y despues e peticion pa pospone e reunion.

Thijsen a splica “ami ta bay dicidi ki dia mi ta yama e reunion, cual ta e miho momento. Mescos cu mi a duna e Minister pa e yega Aruba pa duna su banda, pasobra esey ta e principio di bon gobernacion. Ora e bolbe, e lo papia cu Prome Minister. Pero esey no ta nifica cu e reunion no ta sigui,” Thijsen a bisa.

Presidente di Parlamento Ady Thijsen ta reaciona riba impase den coalicion di MEP-POR-RED

Posted by 24ora on Monday, August 3, 2020

Hopi biaha ta drenta mocion di desconfiansa durante e reunion. Den esaki ta un problema cu a surgi den partido, a bin cu intermediacion y despues el a b ay den Gobierno y tambe a busca intermediacion. Despues a bisa cu ta den Parlamento mester dicidi riba si e tin confiansa of no,  y esaki a sosode. El a haci un comparacion cu loke a yega di sosode na Hulanda. E cos di mas malo ta pa un politico caba su carera cu un mocion di desconfiansa y na Hulanda e politica a scoge pa e mes baha. Pero na Aruba e Minister (Lopez Tromp) a bisa cu si kier bah’e, mester hacie den Parlamento. P’esey a yama un reunion.

Presidente di Parlamento a expresa cu esun cu actua contra ley mester asumi su responsabilidad, y pa e motibo ey e reunion posponi diabierna lo sigui, pero e fecha e no por mencion’e ainda. E riesgo di e trabou di Parlamento y Gobierno ta cu si mester tin un reunion urgente y si ta necesario su presencia, e mandatario of parlamentario mester kibra su biahe y bolbe Aruba pa atende e asunto. P’esey como Presidente di Parlamento e no a sinti bon cu Lopez Tromp a dicidi di biaha un dia despues caba pa Hulanda.

Di otro banda, mirando cu Prome Minister Wever Croes a dicidi di spera regreso di su colega pa papia personalmente cu ne, Thijsen a dicidi di ta flexibel y warda riba resultado di e combersacion ey, pa sigui cu e reunion. “Nos debe esaki na pueblo, cu e di dos tanda di e reunion ta sigui pa pueblo haya tur informacion. Si bo bisa A, bo mester bisa B tambe. Ta facil pa papia den Parlamento pasobra tin inmunidad. Bo mester para pa loke bo ta bisa. Si bo tin e prueba, saca esaki.”

Pa loke ta e relacion di e partnernan di coalicion, el a bisa “si Gobierno mester cay, e ta cay. Bo tin cu kies den bida … Pueblo a s coge den 2017 pa un coalicion. Bo tin diferencia di opinion pero pueblo a scoge pa esey. Pero e no ta nifica cu bo mester keda cu otro pa semper. Bo tin cu compronde bo ta biba den un estado di derecho. E pueblo ta purba guiabo unda bo tin cu bay. Mi no ta kere cu mester sigui acepta cosnan pasobra kier keda den un coalicion, pasobra bo kier goberna. Mi no ta kere cu sra Evelyn Wever Croes ta un persona asina. Mi ta kere cu e Gobierno aki ta haci su best. Hopi hende ta lubida cu nos ta den un calamidad, y p’esey mi ta haya lamentabel e situacion aki. E ta un problema di un partido cu nan no por ni yega na otro. Cada partido politico mester carga nan responsabilidad. Cada un cu ta minister mester carga su responsabilidad. Esun cu ta kere cu mester acepta tur cos pa motibo cu nan kier keda goberna, ta fout. Esun cu bira politico, mester compronde cu e cos aki no ta pa semper. Tin ta keda un, dos of dies aña. Nos a yega momento cu si un eleccion mester bin, “so be it”,” Ady Thijsen, Presidente di Parlamento a termina bisando.