Awe ta un dia special, segun parlamentario di MEP, Ady Thijsen, kende a fungi den e ultimo reunion di parlamento como parlamentario. Ta un dia special den bida cu ta haci hopi cambio.
Ady Thijsen, prome cu a sigui cu su discurso, den e reunion, a felicita tur esnan cu a wordo scogi como parlamentario, pa representa e pueblo aki, ta deseanan hopi exito, hopi forsa, pasobra ta un honor y privilegio pa por sirbi pueblo.
E Hulandesnan ta bisa “er is een tijd van komen, en een tijd van gaan. De tijd van gaan is gekomen.” Esey ta pa Thijsen mes. E tabata un honor y privilegio pa e por a sirbi su pueblo pa 12 aña den Parlamento.
Politica ta cruel, pero tambe e ta bunita. Critica semper lo bo haya, como politico. Pero semper keda humilde. Keda humilde y keda sirbi bo pueblo. E ta depende di bo mes un persona con bo kier hiba bo politica. Pero hopi biaha ta lubida cu tur tin e mesun meta. E meta ta traha na bienestar di nos pueblo. Y tin biaha ta perde e meta ey. Thijsen mes tabata tin e honor pa drenta parlamento na 2005, unda cu el a bira lider di fraccion di MEP, un encargo hopi pisa, pero e ta hopi contento cu e por a sirbi su pueblo como lider di fraccion di MEP den parlamento pa 4 aña. Despues na 2009 pa 2017 como parlamentario den Oposicion y esey tambe ta algo cu bo ta ripara den parlamento cu e ta haci un diferencia. Pero bo tin cu mantene si.
Semper bo ta representante di pueblo. Si bo ta sinta p’abo of sinta p’ariba, ta representante di Pueblo bo ta. No lubida esey nunca, el a splica.
Pesey mes Thijsen, den e 12 añanan aki el a siña hopi. A bin eyden, bo no por ta profesional, bo no por ta polis, bo no por ta dokter, tur tin experiencia. Pero un mundo nobo ta habri pabo. Bo mes tin cu siña y bo ta siña tur dia. Y te cu dia di awe, Thijsen ta siñando. Pesey e ta gradici tur esnan cu el a traha cu nan y cu a contribui den su desaroyo y por a yuda su pueblo y contribui na dje.
E 12 añanan aki ta hopi, pasobra el a haci hopi cambio den su bida. Den su carera profesional como abogado. El a scoge pa lag’e cay, pa e por representa su pueblo. Pesey e ta bisa cu e ta hopi orguyoso si cu el a scoge esey, pasobra pa ta parlamentario, e no ta facil, pero bo mester tin’e y bo mester tine di curason pa bo por sirbi bo pueblo den esey.
Thijsen ta gradici tambe su partido MEP, e ta gradici nan pa e confiansa, tanto e ex lider, sr. Nel Oduber y tambe e lider actual, sra. Evelyn Wever-Croes, pa e confiansa cu nan a dun’e semper pa e por logra haci e trabao na un bon manera. Tambe na tur su coleganan di fraccion, tanto esun di 2005, 2009, 2013 te awe, e ta gradici nan, vooral esnan di delaster 4 aña cu el a traha cu nan. Tin diferencianan di opinion, pero esey ta sano pa demostra cu, cu union bo ta yega leu. Bo ta yega na bo metanan, Ta union ta conta.
Tambe ta gradici tur su coleganan di e otro fraccionnan, manera di AVP, tambe di PDR y tambe esnan cu ta independiente awo. Tur di nan por a traha hunto. Tabata tin diferencianan grandi di opinion. Tin biaha e tabata bay fuerte, pero di parti di Thijsen, semper el a purba di tene zakelijk, to the point. Pero asina politica ta tin biaha. Bo mester ta skerpi, pero keda exacto.
Tambe Thijsen a gradici griffie y na e trahadonan di parlamento cu el a traha cu nan for di 2005, te cu awe.
Conseho
Thijsen tin un conseho pa tuna. Como parlamentario, representa bo pueblo dignamente. Hiba bo debate fuerte, pero sano. To the point. Demostra cu Parlamento ta e organo mas halto den e estado di derecho di nos democracia. Tin cu demostr’e. Nunca lubida di unda bo ta bin. Respet y confiansa, no haci’e den palabra so, pero haci’e di hechos. Democracia por ta bunita, democracia ta diferente opinion. Si tur hende mesun cos, e ta bira manera dictatorial. Esey ta bon di un democracia. Esey tin cu biba aden, siña respeta otro den esey.
