Diahuebs atardi Departamento di Aviacion Civil (DCA) a tuma un decision drastico pa para tur vuelo di avionnan cu a “fuel” na Aruba. Motibo ta cu e aerolinea Tui a descubri un variacion den calidad di e Jet-Fuel cu nan a cumpra for di Fuels Marketing & Supply Aruba (FMSA) na Aeropuerto. Tabata parce comosifuera cu tabatin awa den e combustibel. Tur cos ta mustra awor cu tabata un “false reading” y cu ningun momento e combustibel tabata contamina. Pio ainda, e departamentonan di Gobierno a hunga un rol masha dudoso den crea panico ficticio y haci masha daño na nos isla.
Tur aerolinea cu ta cumpra Jet-Fuel for di FMSA tin e derecho pa haci prueba sporadico di calidad di e producto. Esaki pa garantisa cu e vuelo ta bay sin problema ni fayo. E aerolinea Tui a dicidi diahuebs cu e ta haci un prueba asina, probechando cu tabatin dos “auditor” di exterior na Aruba pa supervisa y controla trabou di e mecanico di Tui na nos isla.
Ora di haci e “test”, parce cu e mecanico a haya e calidad bon, pero e auditornan no tabatin e mesun opinion. A pidi pa FMSA revisa su producto y haci e pruebanan necesario. Mesora a informa DCA di e situacion y a splica di kico tur ta e accionnan cu e compania ta tumando. E accionnan a encera un revision completo di e tankinan y di e trucknan di entrega combustibel na Aeropuerto. A pensa cu kisas dor di hopi yobida, cu awasero lo a penetra den e tankinan, aunke cu desde un principio caba a descarta e opcion aki debi na tur e medidanan di siguridad cu tin riba y rond di nan tankinan.
Ta prome biaha den mas di 30 aña di existencia di FMSA, cu algo asina ta sosode cu su producto. E compania ta garantisa un producto di calidad y ta check na diferente momento for di transporte, almacenahe y entrega di Jet-Fuel, cu e producto ta di calidad superior.
Pero dor di e accion di DCA, a stroba otro aerolineanan pa tank na Aruba y a pidi nan pa warda te ora cu e pruebanan adicional ta cla. Ora cu a cla y a resulta cu no tabatin nada malo na e producto, a dura DCA mas o menos 3 ora di tempo pa anuncia na e aerolineanan cu nan por bula atrobe. Pa ora cu a comunica nan decision final, ya e oranan cu e personal di cabina y pilotonan por bula, a vence caba y como tal mester a cancela e vuelonan.
Riba dje, ANSA, cu ta e compania nobo cu ta maneha e controladonan di trafico aereo a dicidi di manda comunica cu tur avion den halto cu na Aruba no tin jet-fuel disponibel. Esey a causa mas panico ainda y consecuentemente avionnan a cuminsa desvia pa Corsou y Boneiro pa por yena combustibel eynan. E comunicacion aki a bay sin papia cu FMSA prome y sin tene na cuenta e testnan cu a sali positivo. Claro cu e forma di procede aki a causa cu FMSA a perde hopi entrada riba e dia ey.
Separa di perdida di entrada, FMSA awor ta confrontando gastonan halto cu aerolineanan ta cobrando, debi na cancelacion di vuelo, estadia di nan personal, estadia den hotel di pasaheronan y asina por sigui menciona. Fuentenan den FMSA a menciona cu Gobierno lo hay’e cu tur e gastonan aki pasobra ta decision descabeya di DCA y ANSA a causa henter e problema aki.
Ta bin acerca e publicacion di Prome Minister Evelyn Wever-Croes cu for di New York a skirbi di e sucedido y su tras ya ta pidi pa investigacion y a papia di tuma sancionnan severo. Den esey Gobierno a sali for di e punto di bista cu FMSA lo a comete eror sin ta consciente cu no tabatin ningun eror ni ningun sorto di contaminacion di jet-fuel. Pero den e ultimo alinea di e comunicado di Gobierno ta nota e direccion di e discusion, cu na luna di april ultimo Parlamento a pasa un mocion pa kita FMSA for di bou di RDA y pase directamente bou di Gobierno. Ta sinti cu ta esey ta e meta principal di henter esaki, pinta un scenario fatalista pa por hustifica traspaso di e compania.
Ta sigui e desaroyo aki masha di cerca pasobra e intencion tabata pa Prome Minister elabora riba e tema aki den e conferencia di prensa di dialuna mainta, pero esey no a sosode. Probablemente a inform’e caba cu un hende a comete un “blunder” atrobe dor di un keho falso, cu tumamento di decisionnan robes y cu awor lo bay costa hopi placa. Ta parce cu e investigacion awor lo mester ta hopi mas detaye y no solamente na FMSA, pero sigur tambe na TUI, na AAA, na DCA y na ANSA pa mira unda e asunto aki a bay fout.
