Despues discurso di prome minister di Aruba, sra. Evelyn Wever-Croes, a tuma luga un sin fin di canto y baile durante e acto protocolar. Tabata tin entre otro finalista di Festival un canto pa Himno y Bandera, edad 4-6, Akyra Margarita, cu su danza, Ritmo di mi Cultura. tambe e ganador pa e categoria 10-12 aña di e mesun festival, Genevan Maduro, a presenta su tema “E simbolo di reino lama. javinah Besselink, ganadora di e categoria 7-9, a presenta su cancion Yiu di Cultura.
Coro Nacional Hubenil di nos muchanan di scol, bao di direccion di Maybeline Arends-Croes, a presenta tres cancion y finalmente, prome cu e aubade, Grupo di Baile “Popcorn Dancers”, a presenta un baile cu a personifica e comienso di aña Dia di Betico, te na ultimo cu e tema di nos cantante Jeon, Machika, cu a pone tur hende riba pia.
Finalmente, tabata tin e defile di e gruponan uniforma, di e diferente clubnan social, gruponan scout, Padvindsters, Clubnan Deportivo, como tambe departamentonan di Husticia, manera Polis, CEA, como tambe Cuerpo di Bombero, Cuerpo di Douane y varios otro gruponan social mas. Publico presente a sa di disfruta en grande di e evento aki y un y tur por a mira cu tabata zwaai nan banderin cu orguyo.
