Jorien Wuite representante di D66 den Tweede Kamer a bishita Aruba y tabatin reunion cu miembronan di Parlamento riba diferente tema. A trata diferente punto importante pa futuro di Reino Hulandes, segun Miguel Mansur (fraccion Accion21) a duna di conoce.
Un di e puntonan mas importante tabata riba e tema di deficit democratico. Den e situacion actual practicamente decision di Hulanda ta pasa sin problema. Esaki ta un tema cu e islanan Hulandes den Caribe a bin ta pusha pa traha riba dje.
Segun Mansur a splica, tin cuatro modelo cu por scoge for di nan pa introduci den e relacion di Reino Hulandes. Esaki cu ta hala atencion di fraccion di Accion21 ta e Modelo Danes. Pero tambe tabatin hopi pregunta riba e tema di Landspakket. Pero tambe e no por a evita di señala con Corsou y Sint Maarten ta fia for di Hulanda na 2% mientras cu Aruba ta fia riba mercado internacional na 5.3%. E ta kere cu si por refinancia e 4.2 biyon di debe cu tin aworaki via di Hulanda na e mesun 2% cu Corsou y Sint Maarten, lo nifica cu por scapa entre 120 y 150 miyon florin pa aña. E placa aki e ora por inverti den enseñansa y pa crisis social. “Riba e parti aki nos no ta mira movecion. Nos ta mira un Gobierno y parlamentarionan di coalicion cu ta gusta keha. Ta trece cosnan emocional mientras cu tin un solucion facil bo dilanti, pero ta keda bisa so cu e Raad ta bay trapa riba Aruba su autonomia. Bo no por ta un pais autonomo si bo no ta solvente..
Mansur ta preocupa cu e situacion pa motibo cu na maart awor ta prome biaha cu Aruba ta subi mercado internacional atrobe desde e pandemia. Loke ta sigur ta cu lo no haya e interes cu tabatin den pasado. P’esey e ta kere cu en bes di bay direccion di faiilisement, e no ta mira pakico no ta tuma e paso pa traha proactivamente cu Hulanda pa refinancia full e debe di Aruba. Pues no solamente esun cu tin actualmente cu Hulanda pero e debe completo.
Un di e temanan discuti ta e derecho pa vota den eleccionnan Europeo. Wuite ta na fabor pa kita e exigencia cu un ciudadano Hulandes den e area aki mester registra pa eleccionnan Europeo. Tur fraccion di Aruba a bay di acuerdo cu esaki. Esaki ta haci cu e politiconan Hulandes por bin campaña aki banda. Hustamente e modelo Danes cu Accion21 ta faborece ta duna cada un di e islanan di Caribe un asiento den Tweede Kamer. Esaki ta trece un cambio y lo por pone temanan importante den agenda di Tweede Kamer. Aruba lo tin un eleccion pa tin su representante den Tweede Kamer y lo por trece di e forma aki un miho relacion cu Hulanda.
