Departamento “Sectie Bijzondere Verordering”, conoci como SBV na San Nicolas, ta un departamento specialisa den diferente sorto di permiso manera pa actividad, campamento, negoshi, actividad publico y mas. Ta un seccion masha ocupa y cu regularmente ta organisa accionnan pa eherce control riba negoshinan cu ta rekeri un permiso di operacion.

E departamento tey pa guia tur negoshi pa nan tin nan permiso manera ta stipula pa ley pa nan negoshi.

Recientemente un grupo di polis a haci un investigacion riba e tema di restaurant. Esaki den cuadro di nan estudio policial. A haci diferente control den e districto di San Nicolas cu ta cuminsa desde Pos Chikito y termina na Baby Beach. Den total a controla 54 restaurant den e area aki.

Mayoria di e restaurant nan tabata tin mester un guia pa asina por drecha algun detayes chikito di nan permiso, otro nan permiso tabata na ordo y algun tabata sushi y mayoria tabata limpi.

Den prome y di dos control haci conhuntamente cu DVG y Bombero constata lugar sushi cu a ser publica den un articulo anterior pero a haya lugar nan limpi tambe. E restaurant nan limpi tabata “Gallo Rojo y su panaderia, The Oniel’s Kitchen, Tia Rosa, Saco di Felipe pa menciona algun.

E restaurant nan aki un ehempel pa con un negoshi mester ta pa keda mantene limpi. Hygiena ta un parti importante di un negoshi. E saludo di un persona ta importante pa e departamento di DVG y e parti di seguridad e personal di bombero tin wowo skerpi pa esaki.

SBV di San Nicolas lo sigui monitorea e rayon di San Nicolas pa asina mantene un relacion mutuo cu cada negoshi pero asina tambe keda controla pa cada negoshi cumpli loke tin poni den nan permiso.

SBV San Nicolas ta sumamente contento di por a haya studiantenan di polis enthusiasma cu a bin sera conoci cu e departamento aki un poco mas di serca pa su funcion. Comunidad por ta orguyoso di e studiantenan aki cu a haci un bon investigacion durante nan periodo di stage.

Comments

comments