Accion 21: Nos pais ta unda cu e ta danki n’e partidonan bieu

Diahuebs mainta a tuma luga den sala di Parlamento, e reunion publico tocante caso Tofanelli, caminda cu Eddie Briesen, como Minister di Turismo e tempo ey lo a cera un contract pa Aruba Music Festival pero no a cumpli cu e contract.

Lider di fraccion di Accion 21, Miguel Mansur, a comenta cu por a mira varios suceso. E realidad ta cu ora cu a pasa e contract, ta contra e ordo di contabilidad, cual ta articulo 25 y 31.

Si bay wak e memorie van toelichting di articulo 31, ta netamente pa preveni patronahe politico.

Por a tende algun colega di MEP pa bin caba con bon Aruba Music Festival tabata. E realidad ta cu Aruba Tourism Authority a klapnan, unda cu no por hustifica e un miyon dollar cu a gasta.

E momento ey ex-minister Briesen no a bay defende, e no a bay bisa cu e evento aki lo a trece beneficio pa Aruba na Banco Central. Loke el a bisa cu lo baha e gasto di un miyon dollar pa mey miyon dollar.

Tambe a señala e contract di 2002 y 2004, p’e añanan 2002 pa 2009, no tabatin suma fiho presupuesta. Tabatin regularidad, segun e parlamentario.

Por a tende for di Minister Xiomara Maduro ta gaba di tur e contribucionnan di ex-minister Briesen na turismo di Aruba. Por corda bon, Carnival Cruises a bay y tambe KLM a bay. No ta contribucion positivo pa nos economia y turismo.

Por a tende ex-minister Mike de Meza bisa cu a dicidi cu e no lo bay persigui Briesen personalmente pa viola ordo di contabilidad. Esey tabata su autoridad. T’e mesun minister cu a exonera Glenbert Croes, kende a haci un pago di 1,5 miyon contra ordo di contabilidad, cu e mester a paga bek personalmente.

Loke ta importante pa señala, con e partidonan bieu ta anda cu placa di pueblo, pasobra no ta placa di minister de Meza, sino di pueblo cual nan ta reparti. E ta indicativo pakico nos pais ta den e situacion cu e ta aworaki, ta danki n’e dos partidonan bieu.  E diferencia ta varia poco, pero esey mester cambia.

Den e contestanan di gobierno n’e preguntanan di fraccion, por mira cu Fraccion RAIZ ta haci e minister nan di MEP un pregunta, cu ken ta fout, si ta ex-minister Briesen, of ex-minister Oduber ta fout, cu a haya den un situacion aki.

Mansur a mustra cu si ta kere en berdad e ministernan actual di MEP ta bay indica riba un nota di parlamento, cu nan mesun minister ta culpabel, e ora ta bibando den Lalaland. Mester lanta fo’i soño y realisa cu den parlamento ta un set di piraña tin cu kier Raiz morto, cu kier Accion 21 morto, kier wak MAS morto y mira con e pais aki ta maneha sin ningun contabilidad.

E partidonan ta viola ordo di contabilidad, ministernan ta gasta placa di land Aruba. Despues ta haya un contract cu ta un miyon dollar pa aña y diripiente ta haya e minister ta bisa cu no mester gasta un miyon, y ta bah’e na mey miyon. ATA mes a indica cu e Return on Investment no ta sirbi.

Realmente ta duel Mansur cu t’esaki t’e tipo di gobernacion ta wak na Aruba y e ta indicativo p’asina caba den e situacion aki.

Cu e ley a yega, sa cu RAIZ lo brasa e situacion aki. RAIZ a bay mee y si e ley yega parlamento, sa cu e 11 marionetanan lo vota voor. Esey no ta kita cu mester para firme pa derecho di pueblo. Mester para firme riba violacion di ordo di contabilidad y purba señala, sperando cu hende ta pone atencion, con e partidonan bieu a y ta sigui administra nos pais y pakico nos ta den e ruina y den e necesidad cu nos ta aworaki, e parlamentario a indica.

For di 2009 te aworaki 2023, e ta un tema hopi largo. Segun Mansur, por evita si e ministernan sigui ley. Ora e proximo gobierno bin no bay ple amigo di hende y exonera e ministernan cu no a sigui ley y p’e ministernan haci e trabao cu pueblo ta paga nan y sigui ley. Ora un minister ta viola ley, tene responsabel.