Pa mas o menos 4:45pm a sosode un accidente serio entre un bus grandi di Arubus, specificamente B-100 y un auto SUV marca Toyota modelo Rav 4 color blauw scur cu number A-71241 riba L.G. Smith Boulevard na altura di Fisherman’s Hut yegando Malmokweg. E impacto tabata hopi fuerte.
E prome unidad di Polis cu a yega na e sitio a pidi pa manda Ambulance y Brandweer cu urgencia pa e sitio di accidente. E Polis a ripara cu e chauffeur y pasahero den e auto tabata pega.
Na tur a yega dos ambulance na e sitio hunto cu un Rapid Response Unit di IMSan cu e “Officer van Dienst”. Na final el a raporta cu a hiba 2 victima cu ambulance pa Hospital. Ambos tabata den e Toyota Rav 4. El a admiti cu a trata varios pashent den e bus grandi di Arubus, pero ningun di seriedad y tur a firma cu nan no kier atencion medico y no kier bay Hospital. Tur tabata turista.
Cuerpo di Bombero a presenta cu cuater unidad na e sitio, entre nan un Materialenwagen y e “Officer van Dienst”. Nan trabou tabata pa corta e Totota Rav 4 di tal forma pa por a saca e chauffeur y e pasahero for di e situacion cu nan a keda aden, despues di e accidente.
Polis tabata presente na e accidente cu varios unidad, specialmente di trafico. Na e sitio nan a scucha varios testigo cu a conta cu e Toyota Rav 4 a bay haci un medio U-turn riba caminda. El a baha caminda grandi, subi e caminda di santo den banda y bira subi bek mesora. E no a tene cuenta cu e bus biniendo for di Malmok direccion Oranjestad.
E impacto tabata hopi fuerte, notabel riba e sla ricibi na e parti dilanti di e bus y na e auto tambe. e bus probablemente lo no ta sirbi mas despues di e impacto aki.
Turistanan cu tabata den e bus a spanta dor di e accidente pero despues di un rato a saca potret, selfie y tur, pa publica riba rednan social di nan experiencia na Aruba. Algun di nan tabata Mericano y tabatin hasta Italiano. Nan a bisa cu e chauffeur di Arubus no por a haci nada, pasobra nan a mira con e auto a haci un maniobra prohibi riba caminda. Nan a bisa di a keda satisfecho cu e atencion ricibi di autoridadnan na e sitio.
Nos no por keda sin remarca cu ta nota un progreso inmenso den e sinergia y efiencia di trabou entre cuerponan di rescate na e sitio. Tanto Polis, Brandweer y Paramediconan di IMSan a sa di traha deligentemente, sin stroba otro, cu e victimanan central, pa despues continua cu e parti di investigacion relaciona cu e accidente. Bon trabou!
