Accidente pa motibo di cuminda cayente cu a cay riba chauffeur

2151

Un cabayero a bay cumpra cuminda na restaurant y na caminda pa cas, e box cu cuminda cayente a cay riba dje cu a causa el a haya su mes envolvi den un accidente. Tabata diabierna algo pasa di 12:30 pm e accidente aki a tuma luga na Ponton, den area di Scopetstraat. E Ford blanco tabata riba e caminda grandi mientras cu e Chevrolet color oranje a bay subi caminda na e T-kruising.

Dado momento cuminda cayente a cay riba pia di e chauffeur di e Ford, kende maniobrando cu e dolor y kita e caminda, a bay na su banda drechi y e no a mira cu Chevrolet tabata subiendo caminda.E impacto tawata basta fuerte unda cu ambos chauffeur a keda levemente herida. Ambulance a presenta pa duna ambos asistencia medico. Chauffeur di e Ford ta bisa cu cuminda cayente a cay na su pia y esey ta e motibo cu el a perde control y accidenta.

Polis di trafico a presenta pa haci investigacion di e sucedido.