Accidente na Bright Bakery Piedra Plat ta laga un mucha herida

Tabata un tiki prome cu 2’or di merdia, cu drenta informe di un accidente a caba di tuma luga net un tiki pariba di Bright Bakery Paradera  na e t-kruising.

Un Mitsubishi tabata bini for di pariba, bayendo pa e rotonde di Bright Bakery ora un Toyota blauw for di e t-kruising a subi su dilanti. Aunke e chauffeur di e Mitsubishi a brake di biaha, asina mes no por a evita mas y a dal e Toyota den banda parti patras di e chauffeur. E daño tabata basta y un mucha chikito a resulta levemente herida.

Paramedico a hinca e mucha den ambulance y a trate eyden mes. Afortunadamente e herido no tabata di e grandi ey y e mucha no tabata tin mester di bay hospital. Trafico a haya basta molester pa pasa, pero Polis tabata presente pa guia e trafico pa asina alivia e situacion mas miho posibel.