Polis a yega pa atende cu un accidente entre un brommer y un vehiculo riba caminda di Sabana Grandi na Santa Cruz cu a termina na detencion di e tata di e victima cu a bira violento y no kier a rasona.
Diadomingo aproximadamente 4:30PM ta pidi presencia di polis riba e caminda di Sabana Grandi net un tiki pabou di e crusada di “New 88 Food Mart” na Santa Cruz. Na sitio por a tuma nota di un brommer tira abou y un KIA Rio cu basta daño material. Segun testigo, e brommer tabata biniendo for di e crusada na “New 88 Food Mart” na Santa Cruz direccion pabou mientras e auto ( Kia Rio shinishi ) tabata bayendo pariba direccion e crusada.
E vehiculo a lora na su man robes dilanti e brommer. Segun por a compronde, e motociclista no por a evita e impacto mas y a accidenta contra e Kia Rio. Un habitante den e bario cu tabata sinta den veranda di su cas a conta cu e sla tabata hopi fuerte y e impacto a pone cu e motociclista a bay halto.
Mientras cu paramediconan tabata tratando e victima, un vehiculo a yega na sitio caminda algun ocupante a baha na careda pa informa nan mes di e situacion di e victima. A compronde cu ta trata di e tata di e victima cu a presenta na sitio y cu tabata mustra bastante altera.
Na sitio e tata a tuma nota di su yui benta abou y a cuminsa puntra polis na e sitio ta ken ta e chauffeur di e Kia Rio cu a accidente cu su yui homber. Logicamente na e momento ey polis no a duna informacion. Esaki a causa cu e tata a emociona / altera cu polis y a cuminsa un sin fin di insulto den direccion di polis.
Amigonan cu tabata cu e persona a trata di calme, mientras di otro bando polis a purba dialoga y mantene serenidad. Sinembargo esaki no a resulta y e tata a cuminsa altera mas y mas.
Despues di a purba di stroba / mishi cu material pa investigacion ( brommer ) na sitio y no tabata rasona mas cu polis, no a keda otro opcion mas cu deten’e e persona aki.
Tin di menciona cu algun persona na sitio tambe a purba involucra y obstaculisa cu e detencion caminda cu situacion por a bira hopi mas serio. Demas coleganan a presenta na ora pa asina domina mirones na sitio y logra transporta e detenido pa warda. Mientras cu transportwagen di polis a hiba e detenido pa warda, a transporta e victima den ambulance pa asina e ricibi tratamento medico na Hospital.