Accidente dilanti di King Ribs lagando tres persona herida

Diadomingo, den careda di 9’or y mey di mainta, a drenta informacion cu lo tabata tin un accidente net p’abao di e rotonde di Ponton, net dilanti portanan di King Ribs, caminda cu tres hende a keda herida. Segun e chauffeur di e auto envolvi, e tabata biniendo di ariba y dado momento el a bira su cara wak patras y diripente el a haya su mes pega riba un palo di luz net banda di un pickup staciona. E palo di luz a kibra y naturalmente e auto en cuestion a ricibi daño. E tres ocupantenan di e auto a keda herida. Tambe un dama, kende na e momento ey tabata saliendo for di e cura, por poco a wordo alcansa pa e auto, cu si el a avansa un tiki mas, e lo por tabata un di cuatro herido. Ambulance a presenta na e sitio pa asina atende cu e heridonan. Apesar di e accidente, polis a manda pidi takelwagen pa confisca e auto accidenta, debi cu e number di auto cu tabata poni riba dje, esta A-3266 no ta cuadra cu e auto y pa colmo, e number di auto no tabata paga tampoco. Polis sigur sigur lo haci su investigacionnan pa wak si e trio lo a horta e number di auto pega riba un otro pa sali trip y haya nan mes den e desgracia. Esey no ta nifica cu King Ribs ta cera. E ta habri manera un clabo.