Tabata den careda di 7’or y mei di diaranson anochi, cu informe a cuminsa drenta di un accidente na e crusada di Weng Kee na Santa Cruz. Prome informacion na sitio a indica cu lo tin un persona herida.
Mesora diferente unidad di Polis a presenta na e sitio pa asina brinda asistencia. A cera caminda pa asina por haci trabou sin problema. Na sitio a compronde cu e auto Hyundai Grand I10 a subi e crusada sin duna preferencia na un Toyota Corolla cu tabata biniendo for di Santa Cruz direccion Piedra Plat.
Aunque e chauffeur di e Toyota a haci tur esfuerso pa brake, no por evita e impacto cu a resulta den uno basta fuerte. E chauffeur di e Hyundai Grand a resulta herida y tabata keha entre otro di dolor na su pianan.
Paramedico a pone riba brancard, hink’e den Ambulance y transport’e pa Hospital. E chauffeur di e Toyota Corolla mes no a sufri niun sla / no a resulta herida.
