Algo pasa di 7’or di mainta, patruya di Noord a bay riba e caminda di Sabana Liber, pa un accidente. Na e sitio, polis ta bin topa cu un Toyota Passo y un Toyota Celica memey di caminda.

Segun chauffeur di e Celica, el a caba di sali for di Sabana Liber Villas pa e subi caminda y debi cu e no a paga tino cu tin trafico ta biniendo for di pabou, consecuencientemente el a dal den e Toyota Passo color blanco cu tabata bayendo direccion p’ariba. Ambos auto a keda cu hopi daño material.

E dama kende tabata manehando e Toyota Passo a ricibi sla na cabes door di e impacto. Polis a pone e chauffeur di e Celica supla y a constata riba e alcmeter, cu el a surpasa e limite stipula di alcohol.

Di biaha a bay over pa detene e chauffeur di e Celica. A pidi pa un transportwagen pa asina transporta e chauffeur pa warda di Shaba. Despues di un rato e chauffeur di e Celica por a bay cas. Ambulance a presenta na e sitio pa asina duna e chauffeur di e Toyota Passo asistencia medico.

Comments

comments