Diahuebs atardi banda di mas o menos 3.30 di atardi, a drenta informe di un accidente na crusada di Morgenster. Na e sitio a constata 2 auto ambos Mitsubishi cu basta daño mita riba caminda. Segun informacion compila na e sitio, e señora cu tabata e chauffeur di e Mitsubishi shinishi Outlander GLX a bini for di noord y prome cu subi e crusada a wak ambos banda si auto ta bin.
Debi cu e no a wak niun auto, a subi e crusada y dal den un Mitsubishi Nativa XL Limited cu tabata bini for di Santa Cruz bayendo pabou. E impacto fuerte a causa cu ambos auto a keda para te na otro banda di caminda.
Un ocupante femenino di e Mitsubishi Nativa tabata keha cu e tin dolor na cabes, sinembargo na e momento ey ambulance no a wordo yama. E auto di Forensys a bin y a cuminsa di biaha cu su investigacion na e sitio.
Polis mes a bin basta despues na e sitio. Trafico biniendo for di Playa a keda basta rato pega debi na e manera con e autonan a keda riba caminda y e takelwagen cu mester a maniobra pa kita e autonan for di caminda.
