Diasabra, pa mas of menos 4’or y mey di marduga, polis di Playa tabata siguiendo un Altezza color blanco, kende tabata wordo maneha pa e conocido JPC. Dado momento polis a perde for di bista. Aparentemente ora cu polis tabata persiguiendo e Altezza, dos auto a hala for di caminda pa asina patruya por a sigui haci su trabao, esey tabata na Rotonde di Santa Helena. Pero na momento cu e Daewoo Racer color blanco, numera A-14998 a hala for di caminda pa patruya pasa bay, e Volkswagen Golf, color cora, numera A-55863 tambe a baha for di caminda, cu no a paga tino cu e Daewoo y a brake, cu e consecuencia cu e Golf a dal tras di e Daewoo. Polis a lora bek y a nota e accidente. A bay check si tur cos ta OK, pero pa nan sorpresa a bin topa cu e homber den e Golf tabata bao di influencia di alcohol. Mesora polis a pone e homber supla, unda cu a nota cu el a surpasa e limite di alcohol. E no tabata kier a coopera cu polis. Mesora a bay over na detene e cabayero aki, motibo cu e tabata core auto bao di influencia. A pidi pa takelwagen pa asina transporta e auto pa warda di Balashi.
