ABV: Si no haya AO-Verzekering no ta firma CAO nobo

Pa casi un aña y mey caba e sindicato Arubaanse Bond van werknemers in Verplegende instellngen (ABV) ta sinta na mesa di negociacion cu gerencia di dr. Horacio Oduber Hospital y ainda no a yega na un acuerdo.

Gina Maduro, presidente di ABV, a bisa di ta compronde si cu ora ta trata di e aspecto di finanza e ta tuma su tempo. Di otro banda, e persona cu tabata lidera e negociacion, sr. Kool, a bay cas y hospital mester a forma un team di negociacion nobo. E dos partidonan ta pega riba dos punto. E prome ta e AO-Verzekering cu ta algo cu ABV ta boga pa keda introduci. A palabra esaki caba den e CAO di 2014, pero hospital no a implementa esaki. “Awo nos ta exigi cu esaki mester bini. Si e AO-Verzekering no bini e biaha’ki den e protocol nos lo no firm’e,” Maduro a bisa enfaticamente.

Banda di e punto ariba menciona, nan tin problema cu e ORT y 55+. Tin un problema grandi na hospital, segun Gina Maduro, unda cu tin hopi trahado di 55 aña. Na aña 2004 hospital a bini cu un social plan, unda cu mayoria hende tin 55 aña. E ta encera cu ora e enfermeranan yega 55 aña an tin e opcion a stop di traha, si nan kier. Esaki ta algo boluntario pero hopi cu a yega e edad aki ta haci uzo di e opcion. E consecuencia di e plan aki ta cu e jongnan cu ta keda hopi biaha mester bay dos biaha nachtdienst. Tabata haya e ORT di 5% incorpora den e salario. Pero aworaki si bini cu e sistema di un tabel di porcentahe, e ORT ta cay afo y loke cu e persona traha, e ta haya. Maduro ta pensa cu si logra yega na acuerdo riba e dos puntonan aki, e ta spera cu den luna di september por firma e CAO nobo.

Loke cu tin riba mesa awo aki ta un suma di 1.5 miyon florin adicional, pa aña, pa e miembronan di ABV.  Esaki ta un parti cu no a logra yega na otro. Despues di vakantie, e sindicato ta bay tene sesion di informacion pa su miembronan. Tambe nan ta boga pa subi e porcentahe di pensioen cu awo ta 11.5% y kier yega na 15% den fase, mescos cu na IMSAN. Gerencia ta bay duna awo 1% extra pero nan a bisa tambe cu e miembronan mester bay duna algo extra, pasobra aworaki nan contribucion ta solamente 2.5%, cu ta bou di e margen di ley. P’esey ta educando e miembronan pa aporta mas na nan propio pensioen. Mientras cu e CAO nobo no keda acorda, e CAO bieu ta keda vigente, y ta boga pa un CAO di tres aña. Esun nobo mester drenta na vigor entrante prome januari, 2019, mirando cu aña pasa e miembronan a haya caba 15% di aumento di salario, cu ta conta di juli pa december, 2018.