E homber Lucien Michelet, descendiente di Haiti, a recobra su libertad diasabra despues di dies dia deteni. Fiscal di Ministerio Publico a dun’e su libertad bek. Mientras cu e señora a logra sali di hospital diahuebs y ta na cas herida ainda, e homber agresor diasabra a haya su libertad.
Tristo cu por zona, pero e homber a haya solamente dies dia cera. Diabierna, cu ta ayera, e señora a bay haci su denuncia oficial na recherche despues cu diahuebs el a logra haya OK di dokter pa bay cas. Y diasabra manera e homber a haya su libertad, el a presenta na e cas pa atende cu e señora. Danki Dios tabatin famia na cas pa evita lo peor.
E homber tabatin hero den su man y a cuminsa menasa. E señora a core bay drenta cura di bisiña pa asina scapa su bida. E agresor a menasa e ruman di e victima. Nan ta insisti cu e homber tin machete den auto pero a baha cu hero den man riba nan.
Un hende a bah’e eynan. Djey el a drenta cura menasa y subi un auto marca Toyota modelo Yaris y a bandona e sitio. Ora polis a yega el a bay caba. E biaha aki e mes a presenta na ward’i polis di Playa y atende cu autoridad. Ey a deten’e mesora. A pone recherche na altura di e caso aki.
E señora a bay oficina di recherche atroba pa splica nan cu si nan no haci nada, e homber lo mat’e. E speransa ta cu e biaha aki si fiscal di Ministerio Publico lo tuma e asunto na serio!
E maltrato mes a sosode dia 11 di januari ultimo. Lucien Michelet a agredi su pareha den un forma cruel. El a laga e señora cu su cashi wowo kibra y hopi daño na su cara y cabes. E caso aki a sosode den Madiki Kavel.
Ambulance a bay cu e señora y mester a activa specialistanan pa opera y scapa wowo di e señora. E señora indefenso mester a soporta tur e golpinan die abusado. Na yegada di polis e agresor cobarde no tabata t’ey. El a bandona e sitio den un Toyota Yaris A-22485. Polisnan a cuminsa busca e homber tur caminda.
Despues cu polis a bandona e cas ora cu ambulance a hiba e señora pa hospital, e homber a bolbe y subi otro auto bandona e sitio. Polis a kere cu e ta den e cas. E homber a logra traha su nachtdienst y mainta si recherche a presenta y detene.
Su acto tabata hopi serio y violento. Ta maltrato serio cu fracturanan laga na curpa di e victima. Pa colmo el a core huy despues di su acto baho. Sinembargo, fiscal a dicidi pa want’e 10 dia cera y diasabra lag’e liber, cu consecuencia cu el a bay na cas di e victima cu menos bon intencion. Danki Dios famia a salb’e, sino e consecuencia lo tabata pa e fiscal, cu aki a “gamble” robes, pa no mester a traha weekend riba e caso aki.
