Rond mundo prijs di producto petrolero ta subiendo. A base di esaki, den luna di april y mei 2019, prijs di gasolin na Aruba lo mester a subi cu un total di 30,2 cen den dos luna di tempo. Den april e mester a subi cu 16,3 cen y den mei elo mester a subi cu 13,9 cen.
Na april a sali splica cu Gobierno a yega na un acuerdo cu Fuels Marketing and Supply Aruba (FMSA) pa absorba e aumento di prijs di gasoline cu 16,3 cen, mientras cu ta haci uzo di otro forma structural pa calcula prijs di producto petrolero. Pues a base di esaki den april no tabatin subida di prijs di gasolin.
Pa locual ta mei a yega na e acuerdo pa tene e subida na 11,8 cen, cu ta un aumento total pa cubri 3 luna, esta april, mei y juni. Esaki ta trece cune cu den mei prijs di gasolin lo conoce un subida di 11,8 cen, pero na juni atrobe NO lo tin subida di prijs.
Na tur FMSA lo absorba mas o menos 3 miyon florin cu definitivamente no lo sali di nan saco, sino lo descont’e for di e dividendo cu lo mester a bay pa Refineria di Aruba, cu na su turno lo mester a pasa pa nan doño, Gobierno di Aruba. Den e caso aki, a haya un ordo pa absorba, locual na final lo bay for di e mesun dividendo. Esey ta nifica cu e dividendo cu a spera di haya e aña aki lo bira menos, pues e expectativanan di CFT tambe lo cambia na caminda.
Expertonan ta teme cu e prijsnan lo sigui subi e luna aki tambe. Gobierno como tal ta hungando un wega di “ruleta Ruso” aki cu prijs di combustibel pasobra si e sigui subi e luna aki, ta con lo bolbe absorba e sla aki pa un luna mas? Ningun hende no por premira ki ora e prijsnan lo baha bek, specialmente pa e retonan na Venezuela.
“Gobierno di Aruba ta buscando un alivio pa den e ultimo dos luna a yuda absorba 18,4 cen di aumento di gasolin y a pasa pa uza un otro manera pa calcula e prijs di benta di producto petrolero na Aruba. Si no a haci nada, den e dos luna nan aki Pueblo lo mester a conoce un subida barbaro di 30,2 cen”, asina Minister di asuntonan economico, mr. Xiomara Maduro, a bisa awe riba su pagina di Facebook.
