Mester kita e Polisnan responsabel pa morto di Mitch Henriquez na aña 2015, for di trabao of prohibi nan di eherce e funcion y un castigo di prizon incondicional di un minimo di 6 luna. Esey ta loke abogadonan Richard Korver y Mireille Lousberg a pidi ayera mainta durante e di dos dia di e caso penal den hoger beroep den Corte na Den Haag, Hulanda.
For di Corte e Polisnan a ricibi 6 luna di castigo di prizon condicional. “Nan no mester a paga ningun compensacion na e famia, ni tampoco a sinta castigo ni un ora.” Segun Korver y Lousberg, e confiansa den e estado di derecho di famia Henriquez por wordo estableci solamente si e Polisnan comprometi haya un castigo severo.
“Mas duro cu un ciudadano comun, pasobra nan a abusa di nan poder special.” Esaki ta segun e abogadonan di e famia, esaki tambe ta beneficia e otro Polisnan, cu ta haci nan trabao cu integridad.
Korver y Lousberg a bisa cu ta imposibel cu un hende mester di un “Declaracion di Comportacion pa un trabao simpel na Schiphol y cu no lo ricibi si nan a comete un robo chikito, mientras cu e agentenan condena a ricibi un garantia di trabao y y por sigui traha manera nad’un pasa!
Pa famia e tristesa despues di cuater aña di e morto di Henriquez ainda ta curu, mescos cu ta ayera el a fayece como consecuencia di e detencion bruto pa Polis. Den e Corte, su ruman muhe Lila a bisa Hues na Den Haag cu e ta sinti cu su famia ta e uniconan castiga pa e morto di Henriquez. E famia no ta considera e sentencia di seis luna di prizon condicional di e agentenan DH01 y DH02.
Lila: “E Polisnan a horta e minuutnan pa salba mi ruman. Simplemente a tuma tempo pa bebe un boter di awa mientras cu mi ruman ya por ta no tabata na bida. Y despues a gaña bisando cu el a bira malo den e bus. Mi no ta compronde di unda nan ta saca e curashi pa bisa esey.” Famia tin un gevoel fuerte cu tin man riba cabes riba e Polisnan aki. Mientrastanto nan a mantene nan trabao y nan identidad teni secreto te cu e dia di awe.
Cu e Polisnan a bay hoger beroep y ainda a mantene cu tabata trata aki di un “aresto normal”, cual segun Jennifer Petrocthi, e ex di Henriquez y mama di su yiu homber, ta incomprendibel. “Tur hende por a wak cu esaki no tabata normal. E Polisnan a haci manera cu Mitch tabata un hulk cu a keda resisti. Cada biaha cu mi mira e imagennan, mi ta puntra mi mes dicon nan a dura asina largo cu esaki.”
Segun e di dos ruman muhe di Henriquez, Germaine, e agentenan ta keda bira e storia. “Nan a haci e victima como un abusado.” Desde morto di su ruman homber, e confiansa den Polis a keda. “Polis tey pa percura pa tur hende sinti nan mes sigur, pero awo mi tin duda den tur Polis.”
Mama di Mitch Henriquez a papia di su decepcion grandi pa loke ta Corte. “Dicon nada no a wordo haci pa yuda mi yiu homber? Nan a mata un homber cu ya caba tabata benta na vloer. Ningun hende, pero ningun hende a haci algo pa yud’e. Esey ta haci asina hopi dolor.” E mama ta bisa cu te dia di awe ta puntra si durante e transporte di su yiu homber pa warda di polis, mas violencia a wordo uza. “Si bo por a mira e herida y plekinan blauw.”
Awo, e yiu homber di Henriquez, kende awo tin 16 aña, ainda ta luchando cu e efectonan devastado di loke a pasa cu su tata y ainda ta enfrenta e imagennan di e abuso. “Solamente e mester hinca nomber di su tata online….”
E mucha tin un discapacidad intelectual y por lo tanto, ta menos capaz di procesa loke a sosode. E ta yena di rabia y a expresa su impotencia pa un tempo door di herida su mes. “Mi yiu homber semper tin cu wak con su tata aparentemente no tabata digno di wordo trata manera un humano,” su mama a bisa.
Dialuna awo Ministerio Publico lo bay bin cu un demanda.
