Dia 12 di januari abogado mr. Ronny Wix a haci un publicacion den cual e ta conclui cu ni minister di labor, ni e departamento di labor (DAO) tin autoridad pa anuncia arbitrariamente un dia liber. Esaki ta pa e asina yama Carnavalsmaandag. Resumiendo: no tin carnaval, no tin dialuna liber. Ley ta cla den riba e punto aki.
E ta sigui relata: “Otro coleganan tambe a publica articulo cu ta yega na e mesun conclusion. Ademas, asesornan (huridico) a adverti e minister cu e no ta autorisa, sin un base legal, pa declara dia 15 di februari 2021 como un dia liber, manera cu a anuncia den e prome publicacion di e minister y DAO.
Y, sinembargo, e minister a dicidi contra legem (den violacion di ley) y contra di bon huicio, declara dia 15 di februari 2021 como dia liber (manera si na Aruba no tabatin suficiente dia liber na 2020). No mester pensa hopi pa sa pakico tin cu haci esey: Haci e votadonan feliz cu e speransa di obtene voto. E impulso di complace votadonan aparentemente ta bay mas leu cu ley. Un desaroyo extremadamente peligroso cu normalmente ta observa na paisnan di tercer mundo.
Pero no ta trata solamente di viola ley, cu ya ta bastante malo riba su mes, sino tambe di e consecuencianan. Sinembargo, e minister a declara un dia liber (ilegal). Empleadonan cu no conoce miho, tin e confiansa hustifica cu nan tin un dia liber. E ora nan no ta bay traha y e empleadonan cu tin mester traha, e asina yama empresanan continuo (restaurant, hotel, etc.) ta spera un salario di 200% pasobra ley ta prescribi cu si nan traha riba un dia liber, e doño di trabao mester paga 200%.
E doño di trabao ta un di tres persona den e storia aki. E doño di trabao (e tercer persona) ta confronta e ora e consecuencianan financiero di e accion contra-legem aki di e minister. Si e doño di trabao cera su negoshi dia 15 di februari 2021, e lo perde su ganashi pa un dia y lo e mester paga e empleadonan dos biaha (200%). Nos ta papia aki di un daño di miyones.
E pregunta ta si e comunidad empresarial cu ta sufri un daño como consecuencia di e “promesa” aki contra legem di e minister por recupera e daño di e pais of di e minister. E contesta na e pregunta aki generalmente ta afirmativo pasobra actua contra ley ta ilegal. Sin duda, e accionnan di e minister por ta atribui pasobra e tabata sa of mester tabata sa, cu e tabata actua contra ley.
E daño como resultado di su accionnan ta previsibel. Ademas, e daño sufri pa e mundo empresarial ta e consecuencia directo di e acto ilegal aki di e minister. Por lo tanto, e relacion casual ta un hecho. Si yega cerca di gobierno of minister pa obtene un compensacion, ya por rey kende lo mester paga pa e daño… comunidad, por supuesto. Y esey ta solamente pasobra e minister kier a complace un grupo di votado cu e speransa pa obtene voto.
Loke ta yama mi atencion di henter e “asunto” aki ta cu no solamente Parlamento a faya, por ehempel door di no hala atencion di e minister, sino curiosamente tambe e gruponan di interes di sector priva (ATIA, AHATA, Camara di Comercio, etc.). No por haya nan den ningun parti. Of e standardnan na Aruba a bira asina vago cu colectivamente nos ta pensa cu ta “bon” pa un minister por actua contra ley cu tur e consecuencianan cu ta bin cu ne?”
