Abogado Jeannot de Cuba na cabes di ATIA

Durante Asamblea General, Aruba Trade and Industry Association, ATIA, a eligi su directiva pa aña 2019-2020. Manera ta indica den e statutonan di e asociacion, durante e prome reunion despues di e Asamblea General, miembronan di e directiva nombra nobo ta parti e diferente funcionan den board. Como Presidente nobo pa e asociacion a nombra mr. Jeannot de Cuba. E presidente nobo lo tin asistencia di e Vice-Presidente, Ronnie van Trigt, Tesorero, Mireille de Miranda y Secretario, Enrique (Tito) de Cuba.

E directiva ta consisti di 11 miembro en total, representando varios sector di nos economia. Ademas di e Presidente, Vice-presidente, Tesorero y Secretario, e hunta ta inclui Roland Croes, Donald de Veer, Tisa LaSorte, Tristan Every, Frank Snijders, Matthijs Bijen y Juliska Harms.

Jeannot de Cuba tin un carera largo como abogado, el a presidi Raad van Toezicht di APFA, el a fungi como Decano di Orden di Abogado y forma parti di varios comision legislativo. Pa ultimo dos aña Jeannot de Cuba a forma parti di hunta di directiva di ATIA y awor como Presidente e y su coleganan di directiva lo sigui traha hunto cu staff di ATIA pa defende y promove e interesnan di principalmente e miembronan di ATIA y di comercio en general.

ATIA ta gradici Ronnie van Trigt cu a cubri e rol di Presidente di board ATIA pa varios aña y a haci esaki cu hopi dedicacion y determinacion.

Comments

comments